ليت بعض الناس لامر المساجد يدحر الشيطان ويصلي صلاته

كان بيت الأسبوع الماضي من طرح الشاعر مشعل بن صنت العصيمي من الخرج والذي يقول:
ليت بعض الناس لامر المساجد
يدحر الشيطان ويصلي صلاته
وهذا صدى البيت من الشعراء:
الصلاة تخلّي الإنسان ماجد
سالمٍ من كل شرٍّ في حياته
لو شرور الكون في دنياه واجد
الصلاة -ان قبلها الله- هي نجاته
ما يجي له غير في العليا تواجد
المعالي دربها هو من هُواته
سبع الاعضا فوقها لله ساجد
في سجوده طالبٍ خير أمنياته
محمد مقحم المقحم - الرياض
يهدي الله من عباده كُل ماجد
الصلا ه اهم ركنٍ في حياته
نحمدالله في بلدنا اول مساجد
كم من العالم على ذالكون جاته
صانه الله للذي راكع و سا جد
عليه من يحرص بقوه من غلاته
محمد عبدالله الشهري - جبل أثرب
ينْصا المساجد كِل ملتزمٍ وماجِد
هِي عمود الدِّين رِكْنٍ في حياته
وسْط المساجد بين رَكَّاعٍ وساجد
مَن اقْتِدى فيهم قد افلح في حياته
في صلاته طاعةٍ مِع خير واجِد
وبالقبر اول ما يحاسب عن صلاته
ويا زِينها ثنتين والأعين هَوَاجِد
فوق فرضه تنفعه لحظة مماته
سعود عائش الحربي - جدة
واللي يطيع ابليس خسران واجد
مفلس بالثنتين في دنياه و حياته
ياطيب حظ اللي يموت ساجد
لله سبحانه مخلص في صلاته
هذا الفوز الحقيقي يابو ماجد
بعد رحمة ربي ولطفه وبركاته
صالح البشري - الفويلق
ومختصر وقتك ترى ماهوب واجد
واد فرض الله على وقته وذاته
واطلبه في كل ركعه وانت ساجد
دايم المومن تراها من صفاته
في دقايق صلها والصوت هاجد
وكل مسلم وده يحقق مناته
حمد عبدالله الوايلي - حوطة سدير
بيت الأسبوع
كتب بيت الأسبوع الشاعر حمد عبدالله الوايلي من حوطة سدير ويقول:
تعاملك في بعض الأحيان محذور
تخاف من بعض العقول الضعيفه
نستقبل صدى هذا البيت خلال أربعة أيام
من نشر البيت على إيميل الصفحة:
rb-khozama@alriyadh.com