رتب امورك قبل سن التقاعد والراتب العشره يعود لك الفين

بيت وصدى

كان بيت الاسبوع الماضي الشاعر غنام مسعود القريني من نعام حول سرعة الايام ومفاجأة التقاعد للموظف ويقول:
رتب امورك قبل سن التقاعد
والراتب العشره يعود لك الفين
وكان صدى البيت من الشعراء
بالعمر تتعب يالفطين السواعد
وعظامنا بالكبر يلحق بها اللين
واللي موظف راتبه في تراعد
واذا تقاعد يرقب يسار ويمين
بالترقيه كم ينتظرها مواعد
وعند التقاعد ضامه القل والدين
عبدالكريم ابن خزيم - البكيرية
وتبقى حياتك وعيشتك ماتساعد
مرهون لاقصادك وكثر الدياين
ماعاد بك حيل وعظمك تراعد
حتى الرصيد اصفار ماهو ملايين
يابو البزور احسب حسابك وواعد
قبل التقاعد مايداهمك في حين
دامك شباب وكل مافيك صاعد
ابذل جهودك وافهمو يافطينين
حمد عبدالله الوايلي - حوطة سدير
دبر امورك صح قبل التقاعد
قبل تحط وسط الثرى وفوقك الطين
ماينفعك مسعود ولا مساعد
ولاينفعك مليون ولا ملايين
اما الحياه تعيش قايم وقاعد
اما من التجار ولا المساكين
شجعان بن سعود المقاطي - الرياض
واعرف ترى الترتيب اقوى مساعد
والناس بالدنيا على الدرب ماشين
واللي وصل للسن ماهو بقاعد
خص الى منه بلغ حول ستين
ترى الحظيظ اللي الى الخير صاعد
ما يلتفت للدون يتبع هل الدين
والمقتصد يكفيه بعض التقاعد
لا رتب احواله بكل الميادين
علي رشيد الرشيد - رياض الخبراء
قضيتوا الأوقات وقت الشدايد
وأديتوا الواجب سنين ورا سنين
وهذي نصيحة لا تكبر وسايد
وجدد حياتك يا عساها على الزين
في طاعة الله كم تكون الفوايد
لا واهني اللي على الخير ساعين
وكانك تبي الراتب وكثر الفوايد
اعرف ترا المكسب تزودك بالدين
محمد عبدالعزيز الخنيفر- أشيقر
حنا برجاء حلال كل الشدايد
يروف باحوال الضعوف المساكين
لله ترى يحل ماكان كايد
الله يدبرها من العسر للين
نتعب الستر الحال والعمر بايد
ورب هالالفين تنزاد بالفين
سعد صنهات السهلي - الدرعية
في هالزِّمن قلِّ الخَوِي والمِساعِد
ومامن عوينٍ غير ربٍّ لكِ يْعين
فكِّر قبل يأتيك سنِّ التقاعد
في مصدر يغنيك عن حاجة الدين
وكِّل أمورك للولي ثم كابد
واعمل إذا تبغى حياة الكريمين
ما دام لك عقلٍ وقدره وساعِد
لا تهدر أوقاتك وتخسر لك سنين
غير الوظيفه فيه جملة روافد
تغنيك عن خلقٍ قِرِيبِ وْبِعِيدين
ناصر بن جمعان آل عوض - وادي الدواسر
لا تلتهي في وقت راتبك واجد
يروح مالك للسفر والدكاكين
لي جاء الفنش لينك على الصاج قاعد
مرتب ضعيف طايح منه ثلثين
خذ النصيحة كان تسمع ياخالد
امّن سكن للمعزبة والبزارين
يالله ياللي يطلبك كل ساجد
توفي عن اللي ماتهنى من الدين
سعود عبدالعزيز الهزاع - نعام
من لايحسب احساب وقت التقاعد
يمكن تجمع وزادت البله الطين
ولاكل من متقاعد معاشه يساعد
ويمكن مع الايام يضطر للدين
قالوا تشبب دور الناس واجد
و ياحلوها لاصاربالبيت ثنتين
ماخاب عبد يطلب الرب ساجد
وفعل السبب مطلوب لاتقول بعدين
خليف بن فهيد الحربي - الرياض
يا ناس رزق العبد بيدين واحد
الواحد الله خالق النفس من طين
خلك معه يا خوك واحذر تباعد
وابشر بعزك لا تخاف الأمرين
حظك وقدر من ولي كل عابد
وقسم الأرزاق بين المساكين
والعشره والألفين في جيب زاهد
نعمه مادام الله معافيك ومعين
علي الزولاني الفيفي - بيشة
لا تفرح بقرضٍ بليا فوايد
اخذه سهل لاكن تسديده الشين
ما غاب عنك اليوم فالصبح عايد
ما ينجح اللي يوفي الدين بالدين
اقل من خمسه قليل الفوايد
يدخل عليك الثلث ويروح ثلثين
ضغوط نفسيه وهمن بزايد
الوضع يدرس ما تغير من سنين
مشعل غنام القريني - نعام
لا من بغيت أعمال فالخير واجد
استغفر الله والمكاسب ملايين
خلك بوسط الليل ساجد وعابد
هذي المكاسب ما خفاكم ودارين
ولا تكثر الهوجاس وتصير راقد
انهض مع اللي بالمساجد مصليت
هذي طبوع خلها لك عوايد
لا واهني اللي على الدين ساعين
ريان محمد الخنيفر- أشيقر
بيت الاسبوع
يكتبه اليوم الشاعر خليف العجيلي من الرياض حول الاسراف في عمل الموائد ووجوب اخذ العبرة من ما اصاب كثير من الدول بسبب عدم تقدير النعمة ويقول البيت:
احفظوا نعمة الله ياملا لاتزول
قيدوها بشكر ونطلب الله يزيد