بيت وصدى

كان بيت الأسبوع الماضي للشاعر حمد عبدالله الوايلي من حوطة سدير ويقول:
الناس في الدنيا ضيوف وماشين
ومادبر الله للمخاليق صاير
وكان صدى البيت من الشعراء:
يا حظ من يحسن ويسلم من الدين
دين الذنوب صغارها والكباير
اعمل جميل وحاسب النفس ذالحين
من قبل لا تظهر عليك السراير
لو احد سوف وغره شياطين
باخر حياته ما تفيد العباير
علي رشيد الرشيد- رياض الخبراء
دار الغرور امرور والناس لاهين
مثل الذي وقف ومن ثم ساير
الله خلق خلقه ونصب موازين
وبين الدروب العقل ماهوب حاير
ترى القدر مابه حذر لوتجي ذهين
الله حكم بالعدل ماهوب جاير
عثمان ابراهيم الرشيد- الرياض
صومو صلو فرضكم يا مساكين
والرابح اللي زار كل المناير
لا فات من ليلك بعد قلت ثلثين
قم صل كم ركعه وهل العباير
بوقتن كثير الناس هم فية غافين
قدام لايكشف خفي السراير
سعد صنهات السهلي - الدرعيه
هذا كلام الصدق والناس دارين
ولاتكذبه ياكود عمي البصاير
الله يثبتنا على الحق والدين
في موقفن تنشر جميع السراير
يارب عفوك يوم نصب الموازين
لابد من يومن تدور الدواير
دعسان غنام العنزي بريده
كانك تبي الخيرات حافظ على الدين
وبالآخرة فكر وﻻ تصير حاير
ﻻ واهني اللي على الخير ساعين
هذا هو المكسب وﻻ به خساير
اغنم زمانك قبل ﻻيومك يحين
و افهم كﻻم اللي لك اليوم شاير
محمد عبد العزيز الخنيفر - أشيقر
ما قدر المولى على العبد راضين
سبحان رب عالم بالسراير
راحت سنين العمر و الناس لاهين
وكلن بهالدنيا يشوف العباير
كم نفس عاشت سنين ورا سنين
أحدن نجح واحدن تلقى الخساير
ريان محمد الخنيفر - الرياض
مهما امد الله بعمرك من سنين
صيور ماتردم عليك الحفاير
وتلفي الذي قدمت من زين ِ وشين
بكتاب مايهمل ادق الصغاير
هذاك هو مستقبل اللي حريصين
ويسعون له باخلاصٍ كل الضماير
عبدالعزيز الصالح -حائل
كما ترى ناس قبلنا مقفين
ﻻقو الله مطلع بالسراير
فوق البسيطه التزم مع هل الدين
وابوك وامك خصهم بالبراير
دنياك ما خلت ختام النبيين
شفيعنا بيام حر السعاير
سعود بن عبدالعزيز الهزاع - نعام
طوبى لمن أسس حياته على الدين
بعمال بر و خير جهر و سراير
يا نفس توبي و بالرد لا تبوحين
ما ينفعك الوم يوم الحساير
يالله يا معبود يا مشرع الدين
تغفر لمن هو في معاصيه حاير
خالد بن عبدالله الصفيان - الرياض
كنه غريب بين الاقصى والادنين
ماغرته دنيا العنا والخساير
ابيض فؤاد مثل برق المخيلين
في وجهه النير سمات البشاير
على دروب الفالحين الميامين
شانه رضا الله يوم كشف السراير
علي الزولاني الفيفي - بيشه
اغنم ثواني العمر وابعد عن الشين
واحفظ رضا الله في جميع السراير
وش قيمة الروح الخلية بلا دين
مامك على الدنيا كما قيل زاير
حسن علي الزهراني - مكة المكرمة
بيت الاسبوع
بمناسبة صدور الامر الملكي بتعيين صاحب السمو الملكي الامير مقرن بن عبدالعزيز ال سعود وليا لولي العهد طرحنا هذا البيت لمبايعة سموه
على كتاب الله وسنة رسوله
يابن الامام مبايعيينك ومبروك
نستقبل صدى هذا البيت بثلاثة أبيات فقط تدور حول هذا الموضوع
ويفضل الإرسال عبر الإيميل:
rb-khozama@alriyadh.com
أو على الفاكس 4871070/ 011
ونرحب بطرح بيت الأسبوع