بيت وصدى

كان بيت الأسبوع الماضي لمعد الزاوية حول بر الوالدين بعد ان اقترحنا ان يكون موضوع البيت اختيارياً للمشاركين والذي يقول:
اخفض جناحك ذل للوالديني
ترى الجزا جنس العمل والعقايب
وكان صدى البيت من الشعراء:
اعنهم المطلب ولا تستهيني
واللي عصاهم كم يشوف المصايب
يا شين قلب قاسين ما يليني
هذي سلوم المعصية وانت خايب
يا ما لهم لاجلك كثير الحنيني
تذكر اللي صار يوم صرت شايب
محمد عبدالعزيز الخنيفر - اشيقر
الله ذكرهم بمصحف المسلميني
عقب العبادة قال بر الحبايب
لبوك وامكلازم انك تليني
طعهم قبل تنحط تحت النصايب
برّك سلف يرجع لكم من الجنيني
يجازيك مثله من ظهور الصلايب
سعود بن عبدالعزيز الهزاع - نعام
يا ما تعبوا لاجلك سنين وسنيني
وفي وصلهم يا للأسف انت غايب
للوالدين حقوق لا تستهيني
ان طعتهم يا ما تشوف المكاسب
هذا زمان الوصل وايضا الحنيني
لا تقطعه بين الاهل والقرايب
ريان محمد الخنيفر - الرياض
للوالدين الحق واضح موبيني
تلقى الجزاء بالفعل ﻻصرت شايب
حذرا تهاون نحوهم يالفطيني
من عقهم بالدنيا شاف المصايب
في برهم واجب على كل حيني
هم تاج راسك فوق واغلى الحبايب
عبد المحسن المحيسن - رياض الخبراء
الزم لهم طاعه وقبل يديني
هذا العمل جيد ومرضي وصائب
ترا النبي وصى بهم يا فطيني
لا تعتذر وأحسن لكل القرايب
يا باذل الإحسان حظك متيني
لا قمت بالواجب تشوف العجايب
علي رشيد الرشيد - رياض الخبراء
جزاء من الله وقرة لموق عيني
وسعادة في الدنيا ودفع المصايب
امان وظمان وجنة بعد حيني
سلف ودين ان صرت في يوم شايب
يا يافتى عامل برفق وليني
والله سبحانه يفرج كرايب
حمد عبدالله الوايلي - حوطة سدير
ذيب زعيم البر للوالديني
خدمته للوالد شباب وشايب
أخذ دليلك يافتي يافطيني
من محكم التنزيل والقول صايب
لا ارضيتهم يرضئ الولي ذا يقيني
واغنم زمانك قبل ركز النصايب
عبدالله بن ثمر الودعاني
البروالإحسان للوالديني
وصية الله للعيال النجايب
يجزا عليها الله دنيا وديني
ومن قصّر بحق الحبيبين خايب
وهو دين تستافيه لو بعد حيني
من العيال اما عقوق او طرايب
عبدالعزيز الصالح -حائل
الله هو لي له رفعنا اليديني
يفرح بعبده لا رجع قال تايب
يا علناندرك رضىا الوالديني
والبر بالشيبان حظ وهايب.
اما تفوز بجنة ياعويني
والاتشوف بدنيتينك عقايب
سعد صنهات السهلي - الدرعية
بيت الأسبوع
الاسبوع الماضي اقترحنا ان يكون موضوع البيت اختياريا وبيت هذا الأسبوع غزلي للشاعر حمد عبدالله الوايلي من حوطة سدير ويقول
كثر الغلا يستاهله ترف الاقدام
اللي يروف بقلب خل يوده
نستقبل صدى هذا البيت بثلاثة أبيات فقط تدور حول هذا الموضوع ويفضل الإرسال عبر الإيميل:
rb-khozama@alriyadh.com
أو على الفاكس (4871070/ 011)