صوت الصورة

حرفه قديمه تراها أسلاح
تغني عن الفقر والحاجه
الله ينور لك المصباح
أو يجلب لك الرزق وافجاجه
عبدالكريم بن عبدالرحمن السلوم القرائن
أول زمانه بالمجاديف والغوص
توه شباب والمخاطر تحفه
واليوم شغله بالعسابين والخوص
يقضي نهاره كود شي يسفه
سعد الحماد روضة سدير
العود في حاله يدير التفاكير
يذكر زمان راح لا واسفابه
وين العيال وين ربع منا عير
ولى زمان الطيب وأقفى شبابه
دهام بن محمد المرخان تبوك
عود يسف الخوص قدام الانظار
أبو سط سوق يطرقه كل محتاج
اقفا زمانه ما تخلى عن الكار
يبذل قصارا الجهد مع قل الإنتاج
صالح عبدالعزيز السويح
روضة سدير
يا شايب الرحمن يا طيّب الفال
ذكرتني في ماضي كنت ناسي
افعولكم يفخر بها كل رجال
وتشوش روس مثل ماشاش راسي
فهد مطر المخلفي قصر ابن عقيل
المهنه اللي راحت اليوم نسيان
صارت تراث بالمعارض والاحفال
هذا يسف السعف بالحيل فهمان
يصنع زبيل والاخصاف بالجال
عبدالرحمن بن منصور التركي البكيرية
الا يا بكر سلم على جيل راح
يعتمد على النفس يقضيها
يقوم بفتل الحبل على بطن الراح
والفرشه اللي داخل محله امسويها
عبدالعزيز عبدالرحمن الماجد ثادق
على خوص النخيل الجد يعمل بماضي قد فات
وعليه أجيالنا لابد يا ربعي يعرفونه
مهفات وزبلان وأيضا معهن السفرات
عصور ماضيه واجب عليها اليوم تحيونه
محمد بن عبدالعزيز الخنيفر أشيقر
صنعه قديمه يمارسها الحساويه
يصنع من الخوص اقفاف وحصراتي
ومهفته والزبيل جوّد عراويه
يشيل من نعمة الله عشر وزناتي
سعود عبدالعزيز الهزاع نعام
شايب يسف الخوص في وسط دكان
يضرب مثل للي يقول الشغل وين
اجدادنا اللي وقفوا بوجه الأزمان
عاشوا بدنياهم ولا لحقهم دين
خالد بن ناصر المخيمر روضة سدير
حصر ومحادر مع سماط وطرابيش
وأحسن مهفه عن مكيف بها الحر
ومن طايح النخله صنعنا مناقيش
وبيوت نسكن به وتدفي من الحر
عبدالكريم النغيمشي الربيعية
يا شايب الرحمن مشكور لاهنت
ولا هان من احيا قديم الاجداد
تراثنا الماضي نشوفه أنا وأنت
السوف والسفره وخوصك له بداد
حمد عبدالله الوايلي حوطة سدير
أثرها هذي حياتك من أول ياجدي
نصنع وتتقن في حياتك اللي صنعته
ياليت الوقت يمضي بسرعه الين يعدي
وأقول لاحفادي ما سمعته منك وشفته
عمر علي صالح
الشايب اللي تشوفه يابن هذال
ممسك على رزقه وقوت سليم
مهنة شرف عيشة أجيال وأجيال
صارت لنا ذكرى وماضي قديم
عبدالله الخمشي المزاحمية
نرحب بمشاركاتكم الشعرية حتى مساء الاثنين على الفاكس رقم 4871070أو الايميل الخاص بصفحة الخزامى:
khozama@alriyadh.com
زاوية: (صوت الصورة).. وياهلا..