صوت الصورة

بيت الشعر بنت النشاما تسويه
بيت الكرم والجود وأهل الشكالة
ماضي عريق وحاضر نفتخر فيه
تراثنا موجود رمز الأصالة
محمد عقار المطيري - عنيزة
ما بين غزل الصوف وسف الجرايد
شفنا بنات اليوم في واقع الأمس
أحيوا التراث وفعلهم حيل كايد
ما بين شد ومد وأحيان باللمس
محمد بن عبدالعزيز التمامي - الرياض
شدي خيوط الصوف بيديك وإنطيه
بيت الشعر محلاه مبني وممتد
خيطه على مغزلك بيدك برمتيه
بالصيف بارد والمطر منه يشتد
فهد بن عقيل الطويان - بريدة
شقيقة الرجال في ماضي فات
تشارك بشغل في الصحاري والأرياف
الحاضرة بالخوص تسويه حصرات
والبادية بيت الشعر تصنع أصناف
سعود بن عبدالعزيز الهزاع - نعام
في كل عام يرجع الفكر قدام
وتشوف شي من زمان نسيناه
يسلم لنا اللي فكر الناس ضرغام
زيزوم نجد ويسلم اللي بيمناه
عبدالكريم النغيمشي - الربيعية
أمنول الزوجة بها يضرب أمثال
تسدى وتنجز واجب البيت كله
ما هيب مثل اليوم تستكثر أعمال
والسوق والمشغل دروبه تدله
سعود بن سعد الحافي - الرياض
يوم البداوة زمان الشين
والفقر والعوز والفاقة
تنسج ألوفه على خطين
ياحليلها شدت أرواقه
عبدالمجيد محمد البدر - حفر الباطن
أحدن يسف الخوص وأحدن يمده
حرفه قديمة ليت ربعي يشوفون
حصيرها زين يوم جت تشده
فيه العراقة والقدامة وبعض فنون
عبدالكريم عبدالرحمن السلوم - القرائن
يابكر يانسل الرجال الكريمه
بصورة خزامى عدت وقت لنا فات
ذكرتنا يابكر مهنة قديمة
مهنة شريفة في العصور القديمات
سلطان بن حمد الحبابي - الطائف
ياوخيتي همي وخلي السواليف
البيت مطلبنا ترى الصيف جانا
نبني لنا بيت جميل على الكيف
لعيالنا وربوعنا ومن لفانا
محمد بن عبدالعزيز الخنيفر - أشيقر
صورة جميلة من تراث أجدادنا
صنعه تسر العين ومن الفقر أمان
تراث من أجدادنا لأولادنا
ممتد من ذاك الزمان لذا الزمان
علي بن معاضة - الرياض
نشمية على مشد السدو تنسج الزل
والذربة الأخرى تقل الخوص وتسفهه
ومن بينهن شاهي يجي قبله الزل
أحين تراث المهرجان بذوق وعفه
حمد عبدالله الوايلي - حوطة سدير
تسلم يمين اللي لها في الغزل باع
تغزل من أصواف الغنم فرشة البيت
واللي تسف الخوص ياناس بابداع
جداتنا ذاع لهن بالزمن صيت
خالد بن ناصر المخيمر - روضة سدير
سلمت يدين اللي تغزل وتحوكي
شف واعتبر ياجيلنا كيف عشنا
ماهمنا ركب الشبح والشروكي
يم الحرف قوموا نعزز وطنا
علي الغنام - ثادق