صوت الصورة

جاك الكفر بشنطة التكسي
البنشري شالها بجره
والشاحنة بدربها ترسي
وسواقها ما على عمره
عواد بن مطرود الشمري - حائل
منول يشيل حمول واليوم ينشال
موتر صغير بالشوارع يشيله
مثل العمر يفنى ولو الزمن طال
لابد يوم والمنايا تجيله
سعد الحماد - روضة سدير
وضع الكفر في شنطة صغير محظور
خلّك نظامي لا تشوف الملامه
ولا انت يا صاح معذور.. معذور
هذي جريمة تفتقد للسلامة
لا من بغيت الصدق فاسمع هل الشور
واجب على المسؤول يكتب غرامه
محمد عبد العزيز الخنيفر - أشيقر
على كراسيدا ركبت وتعنيت
اشيل تاير والمسافه بعيده
المور بنشر في مكان تعديت
هذا خطا بس المواقف عنيده
حمد عبدالله الوايلي - حوطة سدير
كل شيٍ له يالقرم ترى مقياس
ولو تبغى تشيل ذا يلزمك عراوي
شيلتك للكفر خلت وضعكم منحاس
مثل القطيع اليا جا ذيب ولا فيه شاوي
ماضي بن زيد القضاعي – الشعراء
الكفر كبير والشنطة صغيره
الكفر يحتاج سيارة وسيعه
صاحبه ليته وجد من يستشيره
ومن يحل المشكلة لازم يطيعه
زبن مقبل العنزي – بريدة
وين النظام اللي عنه دون يحكون
عبر التلفاز وألا بوسط الصحافه
وينه عن اللي خالفوا كل قانون
أرواحهم بين الخطر والسخافه
أشكي وكل الناس لا شك يشكون
من سايقٍ توه يبين احترافه
طلال بن غارم آل فرحان – الرياض
للضرورة إبعض أوقاتنا أحكام
إطار بنشر وضع بوسط الشنطه
والخطر بالورى جاي ما هو بقدام
ياصل بزينه وينك اللى شكى ورطه
سعود عائيش الحربي – جدة
اللي محمّل تايره في الصغيره
العالم الله من مواليد لاهور
لهم جلد عند الأمور العسيره
يوم بنشر القلاب جابه على الفور
سعود بن عبدالعزيز الهزاع - نعام
ياليت ساهر يصورها
أمخالفه لو تدورها
استبنت المور شايلها
ليت أبعراوي يحملها
عبدالكريم عبدالرحمن السلوم – القرائن
الكفر بنشر والعذر ما له أسبير
ودورت ددسن ما لقيت بسهوله
شلته بالكراسيدا دون تفكير
يالله تفكني من ساهر وفعوله
خالد بن ناصر المخيمر - روضة سدير
صورة العدد
نستقبل مشاركاتكم على إيميل الخزامى :
rb-khozama@alriyadh.com
أو الفاكس رقم: 4871070
ونرحب بالصور الهادفة والطريفة