صوت الصورة

الموتر الي شال فوق احتماله
يا كيف ماله واحد اليوم ياوي
ركبوا عليه خمسين من هالعماله
بأسبابهم بعض الكفرات خاوي
من ينصف المسكين ويروف بحاله
الله يرحم حالتك يا العراوي
خالد بن ناصر المخيمر/ روضة سدير
فريقنا فايز وفرحان
ومن فاز كل يصفق له
ابو عراوي من اليابان
جبناه مخصوص من اجله
ياليت من يركب النيسان
للبر يلحق على الحفله
عبدالعزيز الصالح - القصب
الله اكبر يا ولد وش انت شايل
عشّق النمرة مع الكلتش لا يفوح
من زود حملة ناظر الونيت مايل
كنه اللي عالق بالطين مسدوح
اشهد انه واضح قل الوسايل
الله يسهله دروبه وين ما يروح
سعود بن سعد الحافي/ الرياض
ياونتي ونة الحنتور
اللي حموله ثقيلاتي
من الحمل شاصيه مكسور
ما بين روحة وجياتي
سبعين عامل يبون الدور
والليل بعده بمباتي
خالد بن ابراهيم الخزيم/ البكيرية
من يعرف الموتر ويعرف مديله
مانو يركبه لو صعب الزماني
لا مشى كيلو يبي ونشن يشيله
واحجزوله ياهل الورشة مكاني
مرت اسنين على صنعه طويله
فوق عشرين السنة سبع وثماني
غنام مسعود القريني/ نعام
الددسن تشكي زايد الحمل فيها
والجالية ماهمهم غير يمشون
خلوا كفرها قبل تعلن مشيها
يرقد على الرملة وقاموا يغنون
يا صاحب الزينة تعاطف عليها
خفف حمولتها وبعني الدركسون
علي الزولاني - فيفا
ياناس درب الخطر كيف ترضونه
محلا السلامة ويامحلا مماشيها
سيارة ما تحمل لا تعدمونه
ارفق عليها وخفف قبل تنهيها
اليوم هي شالتك باكر تشيلونه
نصيحة قلتها للزول مهديها
محمد بن عبدالعزيز الخنيفر/ أشيقر
ياللي على الددسن ركبتوا بعد فوق
من فضلكم تمسكوا لا تطيحون
ترى الفرامل ماش والزيت محروق
الزيت ما غير وبدل بسيفون
والقير عيا لا يعشق وانا اسوق
ينزل بعضكم لو سمحتوا يدفون
علي غنام الغنام - رياض الخبراء
موتر شفته ترى ماله وسيله
حملته ناس تفر امن الحرابي
لازم يمشي ولو هو ما يجي له
لو على التاير ولو صابه عطابي
ما لقى خير وحاله عزتي له
حب الارض ومخطر من الانقلابي
مبارك محمد بن طرجم الضعاوين/ وادي الدواسر
منعاجة للخلف والشاص منعاج
هلكس مضيومه بخمسين رجال
وليت الوعر مع حملها هز بطناج
لاشك تشعب بين وديان واجبال
لو كان مالكها يقوده ومحتاج
ماطاعهم مهما ادفعوله من المال
فهد بن عقيل الطويان/ بريدة
يا سايق الموتر اخبرني عن القصة
الاوادم اللي محمل ويش قصتها
اشرح عن الوضع قبل نصادر الرخصة
عطني علوم القضية من بدايتها
عطني عذر مقنع ونعطيك آخر فرصة
بشرط تشرح عن الحملة وفكرتها
سلطان بن حمد أبو شقاف الحبابي/ الطائف
يا راعي الموتر تراك امتهور
شغلك خطر ومخالف للنظامي
ان كان تمثيل وموقف مصور
فالمشكلة هانت ولابه ملامي
العقل زين والسلامة اتدور
من لا تعلم ما يفيد الكلامي
علي رشيد الرشيد/ رياض الخبراء
عزاه يالددسن ركبها مية زول
جمهور كامل كلهم يرقصوني
كل واحد منهم تقل سجل القول
وان داس للددسن غشتهم شجوني
ماطقوا الطاسه ولا معهم طبول
جاروا على التنده لها يضربوني
مالومها لو ترفع الصوت وتقول
يارب ترحم ضعفة الداتسوني
عبدالكريم النغيمشي/ الربيعية
صوت للصورة دعاني للقصايد
يامصورها خذ التعليق كله
الونيت اللي يشيل الحمل كايد
شايل حمله ولو يزداد حمله
مرتكي للحمل في وقت الشدايد
ماشي بخطه وحمله جايز له
زايد منور الحربي/ الرياض
حمل الموتور ما خاف انقلابه
انت يا السواق خالفت النظامي
انحنى شاصه مثل قوس الربابه
والكفر في البدي بيحطه عدامي
ضاق صندوقه وركبوا فوق بابه
بعضهم مبسوط ويشر بالسلامي
شبيب حمود القحطاني
محافظة المزاحمية