بيت وصدى

كان بيت الأسبوع الماضي حول مقترح الأخ عبدالعزيز الحسين من الرياض والذي يحث على صلة الارحام وعدم قطيعتها والبيت للشاعر زيد زياد المفضلي من الرياض والذي يقول:
لارحامنا لازم تدوم الزياره
والله يقطع ياعرب من قطعها
وكان صدى البيت من الشعراء
ياغافل عنها تراها خساره
ﻻ تشغلك دنياك واحذر ولعها
ياادمي ﻻزم تعدل مساره
واخذ النصيحه ﻻتونا وطعها
ياواصل رحمك تراها تجاره
تجيك دعوه ربي الي سمعها
حمد عبدالله الوايلي - حوطة سدير
كل يواصل قرابته في دياره
شيء لزوم كان تبغى سنعها
الدين حث الناس في كل حاره
من عظم حق الرحمن ربي رفعها
شيء نشوفه في صحيح العباره
بالذكر والمولى بحكمه شرعها
علي رشيد الرشيد - رياض الخبراء
زيارة الأرحام ما هي خسارة
هذي أمور(ن) ربنا اللي شرعها
الله من رجل(ن) بعيدن دياره
لأجل التواصل كم فيافي قطعها
زود المواصل طولت(ن) في عماره
ونفسن تحب الخير ربي رفعها
محمد بن عبدالعزيز الخنيفر - أشيقر
صلة الرحم تقرى بنص العبارة
وفي خطبة الاسبوع كلن سمعها
الدين وصّى وحطها فالصدارة
خص الاهل والرحم واللي تبعها
احرص وزاور كل رحمٍ بداره
والحرمة اللي والدك قد رضعها
سعود بن عبدالعزيز الهزاع - نعام
عبدالعزيز نشكره لاختياره
وياحي دين ياجماعه وضعها
وصى بها الرسول تاره وتاره
ولاخير فيمن يارفاقه قطعها
من يقطع الارحام يعلن دماره
الشجره اللي من غباه اقتلعها
سعد الدوسري / وادي الدواسر
قطيعة الأرحام نقص وحقارة
هذي دروب(ن) مابها الخير دعها
ترا التواصل ما خفاكم مساره
وهذي سلوم(ن) يا هني من تبعها
لا وا هني اللي الزيارة شعاره
غلطان ياللي ما مشاها منعها
ريان محمد الخنيفر - الرياض
بيت الأسبوع
حول مقترح الاخ تركي الدويش من الرياض تعثر كثير من مشاريع الحدائق وعدم اكمالها لسنوات ارسل الشاعرمحمد بن عبدالعزيز الخنيفر من أشيقر هذا البيت
الحدايق كثيرة بس ماكملوها
وبعضها له سنين(ن) والمقاول نساها
نستقبل صدى هذا البيت بثلاثة أبيات فقط تدور حول هذا الموضوع
ويفضل الإرسال عبر الإيميل:
rb-khozama@alriyadh.com
أو على الفاكس (4871070/ 011)
مقترح لموضوع بيت الأسبوع المقبل:
ارسل للصفحة الاخ عبدالعزيزالرميح من الرياض مقترحا لموضوع بيت الاسبوع القادم وهو وجوب توخي الحذر عند هطول الامطارالغزيرة والبعد عن بطون الاودية والمستنقعات للمتنزهين وعدم تحدي قدرة الله.