بيت وصدى

الاسبوع الماضي كان بيت الاسبوع للشاعر زبن مقبل العنزي حول مقترح الأخ عبدالله الناصر من الرياض وهو ضرورة إيجاد متنفس بري لأهالي المدن بترتيب من الأمانة والذي يقول:
كل المدن تحتاج للبر ترتيب
تكفون شوفوا يالامانه سنعها
وقد كان صدى الشعراء:
ياصاحبي ترى الترف له مواجيب
واحرص على الترفيه واحذر وجعها
والى حصل بر(ن) تجيه المعاطيب
ليته مخطط كان محد(ن) منعها
حمد عبدالله الوايلي - حوطة سدير
تكفون ياللي تعرفون المواجيب
البر نزهتنا وربي زرعها
الناس ترجو فضلكم يا هل الطيب
تبي التنزه والله اللي بدعها
ومن الجميع الشكر وزود التراحيب
والله يخفف كل نفس وطمعها
محمد بن عبدالعزيز الخنيفر - اشيقر
اللي جمع عفشه وروح على الجيب
يبعد عن الديره وكثرت وجعها
هذي مناة الناس عساه ماتخيب
. يتحقق المطلب بكامل بقعها
علي الرشيد - رياض الخبراء
اليا بغينا البر شلنا على الجيب
ودعاء السفر قلناه واللي سمعها
لازم نسافر لاجل بر ودباديب
يتعب بها السواق لا ماقطعها
مامن حدايق حولنا ياهل الطيب
الله يزينها ويظهر سنعها
سلطان سامي الشمري - الرياض
والارصفه هي والحدايق بهن عيب
وبعض الشوارع ضاق من سار معها
وين الصيانه والغرامه وتانيب
للي يسيئ لديرته مانفعها
وايضا الوعي مافيه شك ولاريب
يحتاج له تعزيز في مجتمعها
فهد بن عقيل الطويان - بريده
بيت الاسبوع
تجاوبا مع مقترح الأخ بدر بن ناصر ابانمي من الرياض حول مشكلة من خدم في التأمينات الاجتماعيه ثم خدم في العمل الحكومي وعدم احتساب الخدمه السابقة ارسل للصفحة الشاعر حامد الغالي من الجوف هذا البيت
خدمت تأمينات خمسة عشر عام
وراحن علي عقب الحكومي سنيني
نستقبل صدى هذا البيت بثلاثة أبيات فقط تدور حول هذه القضية الهامة، ويفضل الإرسال عبر الإيميل:
rb-khozama@alriyadh.com
او على الفاكس (4871070/ 01)
مقترح لموضوع بيت الأسبوع المقبل
ارسل للصفحة الأخ فهد العبدالرزاق من الاحساء موضوعاً مقترحاً لبيت الأسبوع القادم وهو مشكلة تسمم اكل المطاعم بشكل يلفت الانتباه وضعف الرقابه عليهم.