يا بايع الشعر يا مشتري له... ريال جاك أو سقت يجلب لك العيب

بيت وصدى

الأسبوع الماضي كان بيت الأسبوع من طرح الشاعر بدر خلف الحزيمي حول موضوع بيع الشعر الذي يقول:
يا بايع الشعر يا مشتري له
ريال جاك أو سقت يجلب لك العيب
ونظراً لأن قافية الشطر الأول تحتمل النوعين فإن الصدى من الشعراء جاء كذلك على نوعين:
مكسبك من بدع القوافي فشيله
ياللي هدفك ريال في داخل الجيب
وشلون ترضى للقريحة بديله
يا حظك المقرود ياشقة الجيب
الشعر له مبدأ برأس الطويله
مبداه سامي عن كثير الآلاعيب
سعود سعد الحافي - الرياض
ناس تبيع وبالحقيقة مقله
يا شينها من عادة يا أهل الطيب
الشعر ثروة غالي ما نمله
حذرا من التفريط ويصبح تلاعيب
محمد عبدالعزيز الخنيفر - أشيقر
ما يشترونه غير ناس هبيله
ولا يبيعه يا بدر منقع الطيب
بيع المشاعر أو سلبها فشيله
مثل الربا ممحوق من عالم الغيب
ثوب الغنى والبشت ثم الفنيله
من لبسهن بهتان مغرور لا ريب
علي جابر آل زولان الفيفي - بيشه
يا بايع أشعارك ترى البيع ذله
الاحساس ما ينباع بيد المناديب
بيع القوافي عيب كثره وقله
حافظ على شعرك وسمعتك يا ذيب
والشاري اللي بنشرة بالمجله
ماضن يعرف شي عن اللوم والعيب
سعيد بن مرضاح - الرياض
العيب كبه ثم كبه وخله
والشعر ديوان العرب له مواهيب
إما تجيب القاف والقول كله
والمشتري للقاف جنبه تجنيب
صار القصيد اليوم كل يدله
حبك وسبك والمعاني لواهيب
عبدالمحسن بن محمد المحيسن - رياض الخبراء
امتاجر(ن) بالشعر عزي لحيله
لمهنته خاين(ن) وينقال له عيب
إليا انكشف للراي وضعه رثى له
نسي الأمانة أصلٍ كل المطاليب
يا عيب تعطي لشاعر يا فشيله
ويا عيب ينسب له إبيوت مطاريب
سعود عائش التميمي الحربي - القاهرة
الشعر موهوب وحنا نجلّه
واللي يتاجر به من الناس به عيب
ما يصلح إلا منبعه من محله
حتى ولو يصبغ كما يصبغ الشيب
اللي يبي درب وهو ما يدله
ما ياصل المقصود لو يبذل الجيب
علي رشيد الرشيد - رياض الخبراء
بيت الأسبوع
كان مقترح بيت الأسبوع حول موضوع تشققات الطرق وقلة صيانة القديم منها مما يتسبب في الحوادث القاتلة وقد أرسل للصفحة الشاعر زبن مقبل العنزي من بريدة هذا البيت:
بعض الطرق صارت دمار وقديمه
تحت الصيانة جديده ولوحات
نستقبل صدى البيت بثلاثة أبيات فقط حول هذا الموضوع الهام وذلك على الفاكس: 4871070 أو الأيميل: rb-khozama@alriyadh.com.
مقترح بيت الأسبوع القادم:
كثرة المخلفات داخل الأحياء.