صوت الصورة

القعود اللي له زبود ومقيد بقيد
والولد خلفه وماسك عصاه يناوشه
يا ولد خل الفحل دام فعلك ما يفيد
ضاع يومك يا لفتى ضاع وأنت تحارشه
لا تهيّض شامخ الطول لو باسك شديد
ومن بغى يعقل ويصقل لزوم يعايشه
سعود بن سعد الحافي - الرياض
ياللي تسوق الهرش لا تامن الهرش
احذر تراه إن زعل أخف المواشي
وإن لديمك أركز الساق وانحش
تراه ما يرحم صغيرن وناشي
أهرب عنه قدّام تورط وتبلش
خدها نصيحة من مجرّب بلاشي
سلطان بن حمد الحبابي - الطائف
ياجمل سبحان من جملك
وخلاك من أجمل اخوانك
بالعرض زادك حلا وطولك
ورفع سنامك على أمتانك
سبحانه اللي خلق كملك
برجليك وراسك وذرعاتك
زبن مقبل العنزي - بريدة
الفحل لا هاج ما ينقرب لله
كم صبي مات من سبة بعيره
يا صبي لا تقربه وابعد وخله
ذي سلاطين من الله وتدبيره
كان ما تبغاه خلّه ونشتله
بالثمن خذ ما بقي هات تسعيره
مبارك محمد الدوسري - وادي الدواسر
لا ترده أتركه يمشي بهواه
ان عسرته بخف رجلينه وطاك
الإبل قيمه ونوماس وجاه
خذ صحيح القول كاننه خفاك
مشاري خالد الدعجاني - شقراء
هرش ضعيف وفيه هيام
مسكين راعيه مسكيني
خله ورا لا يجي قدام
والقيد في ايديه بتيني
حمود شبيب القحطاني - المزاحمية
ياولد هاده إياك والجهل
بالحلم واللين كل شي يصير
احذره ما أقساه لا منه زعل
فالمثل قالوا أحقد من بعير
الجمل للظلم عمره ما احتمل
لا تعرض له ترى ردّه خطير
ناصر بن جمعان آل عوض - وادي الدواسر
الصورة اللي بالجريدة مصورة
من شافها يشره على الورع بخطاه
الجمل لا من هاج منهو يقدره
ما تجيبه يا هلي حتى القناه
من يعرف الورع يسرع ينهره
لا يتسبب له جملكم بالوفاه
خالد بن ناصر المخيمر - روضة سدير
البعير الزين واماته دواهي
مكسب البياع واللي يشتريها
الدراهم واجده والخير راهي
قيل لاهبت هبوبك فاذرفيها
غنام مسعود القريني - نعام
يا ورع جنب شف عيونه تراعيك
ما تنفعك عجراك لا من تنصاك
ما تدري إنه لا حقد ما يخليك
انحاش يا ورع أهرب بياطاك
غازي بن ناصر البراق
شيف البعير وميزه غالب الناس
وفكرت فيه وشفت كل العذاريب
لقيت عذروبه من الذيل للراس
ما يصلح الا وسط حوش القصاصيب
عبدالهادي حربوش القحطاني
ياولد خل الجمل يمشي لحاله
الجمل هايج وجنّب عن طريقه
السلامه مكسبك مابه جماله
الجمل غدّار ما يعرف صديقه
اتركه لا تمنعه وأطلق عقاله
ما أنت قده وابتعد لا تعيقه
عقلا خزن العنزي - تبوك
الشتا لا قبل توقع وش يصير
وانتبه واحذر من دروب الخطر
الجمل لاهاج فالموقف خطير
لا طلع رغوه ترى فيها القشر
ذي نصيحة للكبير وللصغير
مقصدي يا ربعنا زود الحذر
محمد بن عبدالعزيز الخنيفر - أشيقر
يا الله يا منشي المزون المزابير
يا عالم بالبحر جزره ومده
إنك تمطرها على العارض عصير
ووادي حنيفة يملي السيل سده
رد الفحل يم النياق المجاسير
وأطلق هجاره وفك قيده وهده
شجعان سعود المقاطي - الرياض
ابتعد ياورع يازين السلامه
الجمل هايج وخرعن طريقه
في عيونه شايفك كبر الحمامة
الجمل صبّار ما يترك رفيقه
الفحل هايج ولا تمسك خطامه
والسلامة مكسبك وهي الحقيقة
مطر شباط الفهيقي - تيماء