صوت الصورة

رحلة سياحة بين شلة بعارين
قلنا نغير جو وابليس ملعون
كل الصحاري ممحلة والله يعين
نصف القمر مصيافنا كان تدرون
احقوقنا ضاعت بليا قوانين
قلنا نتمشى وش ورانا على الهون
جومانة العتيبي ساجر
منظر عجيب بمنطقة نجد ماشيف
ولا بشمال المملكة مع جنوبه
سفينة الصحراء تمغط على السيف
في ديرة يبرم بحرها هبوبه
هواه بالصمان ديرة هل الكيف
وان راحت لغيره تراها امغصوبه
فهد بن عقيل الطويان - بريدة
راعي البل مخطي مافيك حيله
كيف تتركها على جال البحور
لو يزم ابها البحر مالك وسيله
لا دفاع ولاحد معك بيثور
ما التهمت اللي طغى في الهند سيله
وآسيا مما جرى راحت قبور
مبارك محمد الضعاوين وادي الدواسر
يا راعي الذود اظنك في البحر جاهل
ما تعرف البحر لا من هاجت امواجه
لا هاج معطاك لاحق ولا باطل
يجرفك موجه لاونك بعالي ابراجه
ولكن خذ ابلك ورح ياخوك لساحل
اترك شواطي البحر مالك بها حاجه
سلطان بن حمد الحبابي - الطائف
عقب المزاين على جده
رحلة على الساحل الغربي
وباقي على القاهرة شده
عرفان للنوق مع حبي
بس البحر خايف مده
ياخدك فالبحر وتطبي
عبدالعزيز بن حمد الرميح شقراء
الذود قصر واتعبه كثر ممشاه
وده يقيل بجانب البحر الاحمر
من شاف حاله قال يارب تاقاه
شاف العناء والجور من الوقت الاقشر
راح البحر يوم امحلت ارض مرعاه
يا الله تفرج له وللأرض تزهر
خالد بن ناصر المخيمر روضة سدير
يا ما حلا ذود تسدح على السيف
قام يتمرغ عقب ما لاعب الموج
في رملة يجلا بها الهم والحيف
يوم المعزب شد بالحمل وخروج
سفينة الصحراء بها العز والكيف
لا صرت في خبة بساتين ومروج
عبدالكريم النغيمشي - الربيعية
يا راعي الذود لا تنساه
وسط المراغه على الشاطي
عزيلها يا ولد عزاه
بترد للشبك ورباطي
والعشب لا زان ما ترعاه
لو هو قريب من الغاطي
شبيب حمود جلهم القحطاني محافظة المزاحمية
للشاطئ الطيب ترانا زبنا
بعد عن الصحراء وشمس قويه
عقب التعب نبي نريح بدنا
عند البحر وونام نومه هنيه
نبي نقلد للبشر وانتهنا
لو ان فعلتنا تراها خطيه
صالح عبدالله التميمي الرس
سفاين الصحراء تقول ونيا
يا مقطعٍ بأخفافهن كل مسهاج
صفرٍ على سيف البحر بركنيا
ما يعرفٍ المد والجزر لا هاج
ما ضنتي بسيف البحر وبعنيا
ولا ذكرهن قانص الريم لا داج
شجعان سعود المقاطي الرياض
الا يا محلا شوف الاباعر والبحر هادي
الا ياشينها لا نوخت باهمال راعيها
اقول الراعي اهملها وعنده يالربع عادي
الا وين المعزب لا يجيها الموج ينهيا
ترى الصحراء مواقعها وعجل حل العنادي
ترى هذي نصيحة قلتها وافهم معانيها
محمد بن عبدالعزيز الخنيفر أشيقر
الجيش قادم من السودان
من الباخرة فكوا قيوده
ومن السفر صاير تعبان
قرب البحر بارك ذوده
والموج هادي ولونه بان
ولو زاد ينخاف من زوده
عبدالعزيز الصالح - القصب
يا راعي الابل رح بها للنفودي
ترعى شجر من كل نوعاً تريده
ارجوك فك شبوكها والقيودي
الوقت فرقة في سموم وجديده
ماهي سفينة للبحر والسدودي
سفينة الصحراء بعيداً مديده
معزي بن صخري العنزي - الرياض
هذا زمان شفت فيه العجايب
على الشواطي تستجم البعارين
وعلى عطايا الله ما هي غرايب
الابل بالصحراء سواة سلاطين
تميم خالد العنقري
وش علام البل عسى في الامر خيره
يا عسى يومٍ عليها ما يعودي
واقفن وحده وباقيها خطيره
ماتت اللي جت بمليون وزودي
شافها الراعي بغى يلقى مصيره
والسواحل للبحر دايم ترودي
غنام مسعود القريني
نعام