يا زين بأهل المجد نظم القوافي

أبشرك يا نجد نايف لنا عاد
وبفضل ربي طيبٍ ومتعافي
اليوم شعب المملكة عنده أعياد
ما دام أبو نواف ما به خلافي
يا الله عساه بخير وسنينه جداد
رجل العطاء وأبو اليتامى الضعافي
من غيبتك ما نطعم الشرب والزاد
واليوم طبنا وطبت والجود صافي
يا ابن المليك اللي كسب كل الأمجاد
اللي حكمها بالسيوف الرهافي
هذاك أبوك وجدنا وحنا الأحفاد
عبدالعزيز اللي جمعنا أولافي
الشجرة اللي وردها يبري الأكباد
أغصونها على المواطن لحافي
هي شجرة آل سعود حكام البلاد
واللي جلس في ظلها ما يخافي
أقولها واثق على روس الأشهاد
وكل على قولي شهد لي وشافي
سياسة وقوة وتعليم وجهاد
وأمر صريح ليا صدر جاك وافي
مشاعري للشعر والمدح تنقاد
يا زين بأهل المجد نظم القوافي
نجدد البيعة جماعات وأفراد
لحكامنا والعز جانا متلافي
أمن وأمان وخير وزيادة أعداد
وحكامنا آل سعود والستر ضافي
أنا أشهد أن للشعب حاكم وقياد
آل السعود أهل القلوب النظافي
وصلاة ربي عد بارق ورعاد
واعداد من لبى بمكة وطافي