الله يجيره من لهيب السعاير

هذه القصيدة في رثاء الأخ: عبدالله بن مزيد بن ضاحي المقاطي رحمه الله :
يا الله يا علام ما في السراير
يا مطلع في كل بين وخافي
يا جاعل ما كان في اللوح صاير
يا مكون الدنيا بنون وكافي
يا من وسعت برحمتك كل ساير
وعفوك على كل المخاليق ضافي
ترحم فقيد صار فقده خساير
يوم أقفلت عنا ركابه مقافي
اللي عليه العين هلت عباير
تهل ما هل السحاب الروافي
يا ما على فقده تجيش الضماير
كل القلوب الصامله والصخافي
حادي عشر سابع شهر جاه زاير
الزاير اللي ما نوى الإنصرافي
واستنفذوا كل الحيل والبصاير
وهيهات لا وصلت لراس المطافي
الله يجيره من لهيب السعاير
ويجعل له الفردوس الأعلى ملافي
لعل فيها له قصور وعماير
ولعل فيها له فراش ولحافي
ولعله يبشر بخير البشاير
ولعل في يوم الفزع ما يخافي
وثقل موازينه بفعل البراير
واجعل موازين الخطايا خفافي
راعي فعول الطيب في كل داير
من مبتدا عمره بتوع سنافي
للطيب ودروبه سريع البداير
وعن مايشين اهل السموت متجافي
يوم النشامى في المراجل تغاير
وحقه مع حقوق المناعير وافي
ما يلتفت يم العلوم الصغاير
نفسه عن صغار المعاني تعافي
همه لحفظان الشيم والشعاير
مادنس السمعه بعلم منافي
وعنده لعصمان الشوارب خباير
ملفا النشامى في السنين العجافي
فرحة عيون اللي يبون السفاير
لاجوا من المطراش والحال جافي
يذبح لهم حيل سمان نضاير
لذه حياته يوم بيته يضافي
راعي دلال في المناره ظهاير
الهيل فيها واشقر البن صافي
تجارته مع كل راعي تجاير
هيل يبهر في الدلال النظافي
أما بحاضر سلم والا مساير
ماجت به أقفت به والأجواد تافي
ماقال أبا أذخر لليالي ذخاير
ولا قال أبا أحسب وأخلي خلافي
هذاك إبن عمي صبي الخساير
اللي وطا الدنيا بالأقدام حافي
والله للاشرد القوافي تناير
من هاجسي من بعد طول الولافي
لصخر من سمان المعاني صخاير
واسوقها حتى تشيب القوافي
عبدالله بن سعد بن ضاحي المقاطي