كافي.. كافي..؟

كافي تلاعب بالبشر يأهل المال
كافي نزيد اوجاعنا اليوم كافي
سحبت اجيوب الناس من مسج جوال
حتى الفقارى المعدمين الضعافي
بيعت مشاعرنا على فلس وريال
وغاب الضمير وغاب جزل القوافي
وربوعنا بالدرب بقفاي وقبال
هذا مغادر صبح وهذاك لافي
تطرد سراب الال في كل ترحال
ترجي حصيل من السنين العجافي
حتى مجالسنا في ابن هن وش قال
سوالف(ن) لاهل العقول الخفافي
لازال عصر الجهل يالربع لازال
مادام فينا ناس باقي غوافي
هذا رجل اعمال يهدر له اموال
وهذا جبر فاتح محله مضافي
وهذا يجمع ناس قطوا للابطال
يصيح ينخى مدوا الصاع وافي
وادفع ولا تنشد تبي تستر الحال
وان غبت قالوا منت والله اسنافي
ما حسبوا للوضع لو قصر لو طال
ولا شالوا اللي يمشي الدرب حافي
ووضاعنا تبغي لها ناس عقال
اهل الفكر واهل العقول النظافي
اوطان تغزى تنذبح فيها الاطفال
ووطان ينقصها الأمن والمشافي
ووطان فيها ناس ارامل وجهال
تبي الغذا تبي السكن والمدافي
وبيوت ما تملك من العيش مثقال
ومن الحيا تخفي الفقر لا يشافي
وقليل منا يرجي الفقر ينزال
وكثير ما شاف الفقر ومتعافي
عرب وبالافكار نتعب لجل مال
بارخص اساليب المكر والتجافي
انقول ونردد بتزيين الافعال
ونسلب اجيوب الغير والنور طافي
مرت تجارب ولا تحسن لنا احوال
قاطع وشارك والدعاوي عوافي
فينا ومنا اجيال وجيال وجيال
تفرح ليا شافت اصورها اغلافي
يا شلة التصويت وش عاد ينقال
باسباب دفع المال صار اختلافي
هضمت احقوق ارجال ورجال ورجال
والامر ما غطاه طول اللحافي
وابسط حقوق الشعر لاريح البال
بالكلمة اللي توصلك للمطافي
ليا قيل تسلم صح راسك وفي الحال
تغنيك عن تصويت ربعك وكافي