تسلم يا أبو متعب

يا شيخ نجد وتاج كل الجزيرة
يزول عنك البأس والله شافي
ويشفيك جبار العظام الكسيره
ولد الملوك اللي على العهد يافي
اللي على شعبه ضفا كل خيره
يحكم بشرع الرب دون انحرافي
دستوره القرآن ما أخلف مسيره
العدل منهاجه ولا فيه خافي
ولا فيه تمييز لهذا وغيره
وافي الخصال وكل ما فيه وافي
والشعب بظل الله وظله عشيره
زيزوم حلحيل معه راي كافي
واللي غدا رايه يجي يستشيره
نور الوطن من وعكته صار طافي
واليوم بان النور وجانه بشيره
عساه في خير ويبقى متعافي
ذخر الوطن وقت الليالي العسيره
وسلطان يا عز الوطن ظل ضافي
يالله من سو الليالي تجيره
عز الضعيف وعز من جاه لافي
ومسيرته يا حسنها من مسيره
ورجل الأمن نايف جهوده تشافي
أمن الوطن همه وعينه سهيره
خفر السواحل قوة ما تخافي
تطرح عدو الدار وتقطع مسيره
ونايف ورا الإرهاب ما قال كافي
وجف منابعهم بكل الجزيرة
وأبو فهد سلمان درع يضافي
ورايه سديد ونور الله بصيره
عيد الوطن في شوفته ومتعافي
طير السعد يا رب وإنك تجيره
رغم العدا وأهل النفوس الضعافي
أهل الهروج الطايلة والقصيرة
وأرجو السموحة كان نظمي القوافي
قصر عن المضمون ضعف إتعبيره
عبدالرحمن بن عبدالله القدير