التدمير المستمر

بالبلدي الفصيح

قوم ياراجل وصل أولاد الجيران إلى المدرسة أبوهم مريض اليوم لا تفشلني قدام جارتي .. يا الله يعني بلاش آخد غفوة بعد ما صليت الفجر
على بال ما يجي وقت الدوام، هوه اليوم بس عشان أبو الأولاد مريض، طيب طيب خلاص دحين حقوم. ونزلت إلى السيارة وشويه نزلوا الأولاد وكل واحد منهم مبرطم برطمة.. قلت يا ساتر اشبهم دول كل واحد منهم برطومو شبر. المهم وصلنا للمدرسة إلا وأشوف كل الأولاد اللي داخلين على المدرسة برضو مبرطمين زيهم، قلت في نفسي ايش الحكاية لا يكون اليوم يوم البرطمة العالمي ؟ ونزلوا الأولاد من السيارة إلا واحد منهم أقول لو يللا يا بابا أنزل رد عليا ماني نازل .. طيب ليه كدا زعلان ومبرطم، مو أنا لوحدي مبرطم كل الأولاد اللي في المدارس مبرطمين زيي سواء كانت مدارس أولاد أو بنات، ايش فيها المدارس فصول مقفلة وحصص وراء بعضها، وبعض المعلمين والمعلمات يجي بس افتحوا الكتب ويشرحوا شويه هدا إذا كانوا فاهمين، وجا التقويم كمان كمل الناقص نروح بيوتنا ونحنا مو فاهمين شي، لا في شرح للدرس زي الناس ولا حاجة، ويكون في علمك ياعمو كل يوم بيجيني مدرس خصوصي يفهمني الدروس، صدقني ياعمو التقويم حيخرج جيل فاشل لا يعرف يقرأ ولا يعرف يكتب ولا يعرف ايش معنى الرياضيات ولا العلوم ولا ايش القواعد، وتجي تقول لي ايشبهم الطلاب مبرطمين، اسكت الله يرحم أمك لا تودينا في داهية، حتى شوف كتاب الرياضيات شوف الأرقام بالملايين ويقول لك اكتبها بطرق مختلفة (قياسية ولفظية وتحليلية) بالله ياعمو طفل في سنة رابعة والا في سنة خامسة والا سادسة ايش عرفو يحلل هادي الأرقام، والا شوف الألغاز قصدي المسائل اللي فيها !!؟؟
أخويا اللي في الجامعة ما يعرف يحلها، ياعمو الله ما شفناه لكن بالعقل عرفناه وأكل العنب حبة حبة، صدقني ياعمو ماصرنا نعرف من المدرسة إلا اسمها، يا عمو المناهج أكبر من عقول الطلاب وأكبر من مستواهم وأكبر من انهم يستوعبوها، والا شوف كتاب لغتي اللي المفروض يعلمونا منه كيف نعرف نقرأ ونكتب خلوه كتاب قواعد تاني يبغونا نستنتج المضارع والماضي والمنصوب والعطف ونحنا يللا نعرف نفك الحرف، وآخر السنة يعطونا الشهادات وكل مادة مكتوب فيها ( اتقن وجنبها رقم 1) والعقول فاضية لا تعرف تقرأ ولا تعرف تكتب وضاعت السنة ونحنا ما استفدنا شي. والمصيبة الكبيرة انه أغلب المعلمين والمعلمات بيشتكوا من دا التقييم فما بالك بنحنا الطلاب اللي المفروض يكون تأسيس التعليم فينا أكبر من كدا عشان لما نروح للمرحلة المتوسطة نعرف راسنا من رجولنا.
بس يا ولدي وزارة التربية والتعليم بتقول انه نظام عالمي؟، يا عمو على عيني وراسي عالمي ما قلنا شي بس لازم يكون في تطبيق للتقييم زي الناس، كيف يعني ما فهمت ؟، يعني المفروض يكون في كوادر تعليمية ممتازة عندهم استيعاب وقدرة كبيرة عشان يوصلوا المعلومة للطلاب والمفروض كمان انه يكون عدد الطلاب في الفصول ما يزيد على 10 طلاب في الفصل الواحد مو محشورين في فصل زي علبة الساردين، وزي منت عارف يا عمو انه الذكاء والإدراك بين الطلاب يختلف من طالب وطالب والتقييم دا فيه ظلم للطلاب وغير كدا لازم تكون المباني حكومية مو مستأجرة وحالتها بالبلا والبلا لاحقها، وياريت كمان ينقصوا من عدد الحصص عشان يقدروا الطلاب يستوعبوا كل هادي المناهج، أسيبك ياعمو جرس دخول الفصول دق.
هاااه ايش رأيكم يا تعليمنا ؟.. وعيشوا كتييييييير تشوفوا كتييييييير.
مثل حجازي: قالوا لفرعون ايش فرعنك، قال ما لقيت أحد يردني.
للتواصل أرسل رسالة نصية sms إلى 88548 الاتصالات أو 636250 موبايلي أو 737701 زين تبدأ بالرمز 150 مسافة ثم الرسالة.