البسي عبايتك والحقيني على السيارة، على فين كدا مودينا ياسيدي؟ وبعدين معاكي لو جلستي في البيت قلتي طفشانة من جلسة البيت وإذا خرجناكي قلتي فين حتوديني، طولي بالك وابلعي ريقك مشوار قريب وحنرجع، ياسيدي قريب فين نحنا وصلنا مزارع رضوى اللي على طريق المدينة، ايوه قلتيلي هادي مزارع رضوى وهناك بعد 500 متر اشتريت أرض هناااااك جنب الجبل وهدا يا ستي الصك حق الأرض وشوفي عاد متى حيرصفوه وينوروه الحبايب اللي في الأمانة. بس تعرفي أحلى حاجة في أمانة جدة انها توزع أراضي المنح تراب خام أما انها تقدم الخدمات للمخطط يفتح الله، وشوفي عاد متى يحن قلبها وتاخد بالها من هادي المخططات اللي بتوزعها، وشوفي بعد كدا عاد الهوامير اللي بيشتروا في دا المخطط ايش بيسووا بعد كدا يبيعوا ويشتروا في عباد الله، طيب ليه كدا ياسيدي غلبت نفسك واشتريت هنا؟ يعني فين حشتري في وسط البلد مثلا إذا كان في وسط البلد وصلت القطعه ل 2 مليون و3) مليون واللي تبعد عن وسط البلد وصلت إلى 500 ألف و 700 ألف وليش تروحي بعيد شوفي أسعار الشقق التمليك الشقة وصل سعرها إلى 500 ألف و800 ألف بالله دا كلام يصدقو عاقل شي مو معقول اللي جالس بيصير في سوق العقار. وبعدين نحنا الغلابى من فين حنجيب الألوفات دي، وزي ما بيقولوا (ايش الديك وايش مرقته) الراتب بيروح في المصاريف والإيجار والمعيشة زي منتي عارفة صارت صعبة وغلا الأسعار شغال سلخ في عباد الله، لكن الواحد ايش يقول إلا ربنا يكون في عون الغلابى اللي زينا، لكن والله لو حكومتنا الرشيدة أعطت لكل مواطن سكن حتلاقي ملاك العماير يغنوا هندي، طيب ياسيدي ليه كدا الأراضي أسعارها مرتفعة؟ لأنه يا ستي ما في أحد قادر يوقف في وجه هادول الهوامير اللي جالسين يلعبوا في سوق العقار على كيفهم وهما ما عندهم مشكلة جالسين يشفطوا من دم الغلابى لكن لو في فرض رسوم على الأراضي البيضاء ما كان حصل اللي حصل حتلاقي الأراضي ياكترها والأسعار معقولة، طيب يا سيدي ليه ما يكون في رسوم على الأراضي؟ والله ياستي السؤال دا تسأليه للحبايب اللي في مجلس الشورى لأنه في يوم 18/5/1431ه كان في خبر نشر في الجريدة دي بيقول (الشورى يناقش اليوم فرض رسوم سنوية على الأراضي البيضاء) وإلى اليوم ماشفنا شي حصل على أسعار الأراضي بالعكس كل يوم سعر الأراضي بيزيد والهوامير اللي محتكرين الأراضي بيزيدوا في أسعارها كل يوم، لكن لو في فرض رسوم على الأراضي ما كان حصل هدا الغلا الفاحش في قيمة الأراضي عشان كدا كنت أتمنى انه الأراضي انتقلت من الدولة وبعد كدا للمطور وبعد كدا للمستهلك حيكون السعر العادل لهادي الأراضي لأرض مساحتها 400 م في حدود 65000 ألف ريال لكن اللي حاصل انه تجار الأراضي بيشتروا أراضي ويحتكروها سنوات طويلة عشان يبيعوها بملايين الريالات لأنهم بيطبقوا المثل اللي اخترعوه (العقار الابن البار)، عشان كدا أتمنى من الدولة انها تتعامل مع تجار الأراضي زي ما تعاملت مع تجار الحديد اللي كانوا محتكرين الحديد وسببوا أضرار للمستهلكين، عشان كدا لازم نتعامل مع تجار الأراضي زي ما تعاملنا مع تجار الحديد لأنهم سببوا أضرار بالمستهلكين ونفرض عليهم رسوم على الأراضي اللي محتكرينها وبهادي الرسوم اللي حتفرض على تجار الأراضي حتنخفض قيمة الأراضي بشكل رهيب، وبكدا يقدر كل مواطن يشتري الأرض اللي تناسبه على قد الفلوس اللي عنده وحتنتعش حركة بيع الأراضي وشبابنا وبناتنا حيتزوجوا لأنه أسعار الشقق الإيجار والتمليك حتنخفض قيمتها، لكن نتركها كدا هايمة وتجار الأراضي بيسلخوا في عباد الله، أعتقد انه هدا الشي لا يرضي الله ولا رسوله، واسمعوا عصام الزامل ايش بيقول عن احتكار الأراضي في اليوتيوب. وعيشوا كتييير تشوفوا كتييير. العم محمد الزهراني لك مني كل الحب والتقدير.
