null

آلو آلو يا أم فتو .. ايوه ياسيدي .. اقولك جهزي العازات انا خارج دحين من الجريدة ولا تنسي اللدو والمعمول والغريبة واهم شيء القهوة العربي .. كل شيء جاهز ياسيدي بس انت تعال بسرعة عشان نلحق نشوف البحر في النهار لانه النهار له عيون .. بسرعة هاااه تبغى تورطيني مع العم ساهر اللي شغال تصوير وقسايم في عباد الله .. لا بسرعة ولا غيرو حمشي على مهلي المهم وصلت البيت وركبت ام فتو السيارة وما فرملت الا وانا في الكورنيش جنب المراجيح واصحاب الدبابات والخيول لانه نحنا الغلابا ما نقدر لا على شاليهات ولا على كباين ولا على سفر حتى واللي فينا كافينا بس بيني وبينكم شي يقهر في كل دول العالم بيكون البحر هوه واجهه البلد الناس تروح تتمشى على البحر وتلاقي الاهتمام والنظافه وتغير جو من هم العمل والحياة ونحنا عندنا هنا نشوف البحر بفلوس لانه هوامير الشاليهات والكباين ما تركوا للغلابا حاحة ماعلينا خليهم يسوو اللي يبغوا طالما ما في احد يحاسبهم .. المهم فرشنا فرشتنا ولسه بنقول يا هادي الا والصراصير والدر (النمل) اشكال والوان حاسونا حوس من كل ناحية هادا غير اصحاب الدبابات والخيول اللي غبروا علينا تغبير ما يعلم فيه الا الله تقول هما في معركه داحس والغبراء .. وشوية اشوف ام فتو تقول شوف الارانب كيف بيلعبوا ويجروا وراء بعض بس تعرف ياسيدي اول مره اعرف انه في ارانب لونها رمادي غامق ؟ هادي ارانب؟ ارانب في عينك من جد عيون كبار للهواء والغبار سلامة نظرك هادوول فيران يسرحوا ويمرحوا زي مايبغوا حتى العراري صارت تشرد وتخاف منهم .. وشوية اشوف فار جاعص ومفتل وفارد عضلاته وصدره وحاطط السيجارة في طرف فمه بيأشر بيده وبيقول تعال اخذت فرشتي وقهوتي وقلت لأم فتو عن اذنك حروح اشوف ايش يبغى الفأر الحبرتي ده .. جلست جنب الفأر وجلس يتكلم وبيقول شايف يبو فتو .. ماشاء الله عارف اسمي كمان .. لا ما اعرفه بس سمعت حرمتك تزهمك وانت جالس انته وهيه تترادحوا زي الطباين المهم خليك معايا واسمع مني ايش رايح اقول .. شايف كيف اهمالكم ووساختكم ايش سوت في الكورنيش لانه اول شي مافي براميل قمامه على طول الكورنيش وهادي مشكلة امانة جدة لازم تشوف حل للحكاية دي وامانة جدة عاد ما يحتاج بلاويها كتييير.. وتاني شي انه بعض العوايل بتجي على البحر وتجلس على الارصفة ولمن تاكل وتشرب مابتشيل وساختها وقمامتها وتحطها في اكياس زبالة عشان يجي عامل النظافة بعد كده يشيلها ومن الكسل حقتهم بيرموها جنب الشاطي وزي منت عارف ايش بتسوي القمايم بتجمع كل الحشرات والبساس هدا غير حبايبك الفيران .. حبايبي ؟؟!! طيب حمشيها لك كمل كلامك .. هدا غير انه اصحاب الوايتات والفنادق والكباين والشاليهات اللي منتشرة في الكورنيش ما بيرموا مويات الصرف الصحي الا في البحر عشان الدكاترة والمهندسين اللي خططوا لجدة من 30 سنه ما حسبوا حسابها مزبوط وقالوا انه جدة ما تحتاج بنية تحتية ولا مشاريع لتصريف مياه امطار ولا مشاريع لتصريف المجاري عشان كده مويات الصرف الصحي بتترمي في البحر وعشان كده صار البحر ريحتوا معفنة ومحد يقدر يتحمل الجلووس من كتر العفانه اللي فيه هدا غير الطحالب والاسماك الميتة والمنتشرة على طول الكورنيش وكله من تحت راس مويات المجاري اللي بتترمي جوة البحر وطالما الطحالب موجودة يعني البحر ملوث وزي منت عارف انه الطحالب بتفرز مواد سامه لو اتبخرت حتجيب خبر كل اللي موجودين في الكورنيش وحتسبب لهم حساسية وامراض نفسيه وطالما الاسماك يا مليح بتاكل من دي الطحالب حتكون كمان الاسماك سامة وخطرة على حياة الاوادم .. آآآآه يبو فتو آآآآه لو كان ده البحر في بلاد بره ما كان حيكون كده حالوو كان شفت كيف حيكون الاهتمام والنظافة فيه وعشان هدا الاهمال صرنا نحنا الفيران اعدادنا بالملايين ومركزنا الرئيسي في المنطقة التاريخية والاحياء القديمه يعني مو بس في البحر حتى جوة الأحياء الجديدة ومناور العماير حتلاقينا وعلى اطراف الارصفة اللي فيها المساحات الخضراء وهدا كله ليه عشان يبو فتو ياحبيبي مافي اهتمام بالنظافة ومافي مكافحة للحشرات والفيران اللي زينا وانا بتكلم معاك بحكم خبرتي في الكورنيش ان مايكون في مكافحة للفيران ترى حنسيطر سيطرة تامة على البحر وعاد شوف لك انت مكان تاني تقعد فيه لانه هوامير الشاليهات والكباين شايفين شغلهم صح ونحنا كمان اعدادنا حتزيد اذا ماتكافحونا وانت والمسؤولين ادرى وابخص والا انا غلطان يبو فتو ؟ تركني الفأر وراح لأصحابه وقلت في نفسي ياعمنا الفأر ترى كل الكلام اللي قلتو صحيح وميه وميه لكن مين يفهم وعيشوا كتيييييير تشوفوا كتيييييير
مثل حجازي/ من شايفك يللي في الظلام تغمز
تعزية / إلى أسرة الأديب الكبير محمد صادق دياب عظم الله أجركم وأحسن الله عزاءكم
abofatoo@hotmail.com
للتواصل ارسل رسالة نصية sms إلى الرقم 88548 الاتصالات أو الرقم 636250 موبايلي أو الرقم 737701 زين تبدأ بالرمز 150 مسافة ثم الرسالة