وا أسفاه

بالبلدي الفصيح

دحين انت ياسيدي ما عرفت تمشينا إلا في الشارع ده اللي كله مويات.. انتي بس امشي على مهلك وارفعي عبايتك شوية عشان لا تتبهدل من دي الموية.. طيب ياسيدي هادي موية مطره والا مجاري؟ موية مجاري ياستي منتي شايفاني حاطط يدي على خشمي من عفن الريحة وقرفها موية المجاري في كل شوارع جدة شمالها وجنوبها وغربها وشرقها معدومة من المويات والمستنقعات.. وشوية تجي سيارة مسرعة وتطرطشنا الاتنين وأسمع أم فتو تقول عساك بالعمى يا بعيد عالم همج ما يشوف المويات المعفنة وهوه ماشي كده زي الأطمش طرطشني وطرطش عبايتي.. ياستي مين قدك أهو جاتك شوية ريحة من بحيرة المسك البنية التحتية إللي مخبوصة خبص وجدة وأهلها هما اللي راحوا فطيس.. طيب ياسيدي وهادي مويات المجاري اللي في الشوارع ما حيشوفو لها صرفة؟ ياستي لو كانوا يبغوا يشوفوا لها صرفة كانوا دبروها من 30 سنة لكن ايش نقول إلا حسبي الله ونعم الوكيل ياريت كل مسؤول صان الأمانه مويات المجاري بتسبح وتسرح وتمرح في أغلب الشوارع سواء كانت الرئيسية والا جوة الأحياء والأزقة كل يوم في الجرايد تشوف صور مويات المجاري العالم ما هي عارفة تمشي من العفن والقرف حقتها أوادم محبوسة في بيوتها من كتر المويات اللي محاصرتهم هدا غير الشوارع اللي فيها المدارس تشوف الطلاب والطالبات مو عارفين يمشوا من كتر مويات المجاري هدا غير الأوادم اللي يبغوا يروحوا على المساجد عشان يصلوا خايفين تنعدم وتتبهدل ملابسهم من العفن والقرف اللي مبهدلهم وربنا يستر من الناموس ومن حمى الضنك اللي كل مالها الحالات المرضية منه بتزيد في المستشفيات والحبايب حقون الرش ما عندهم فكرة يجوك طايرين بالونيتات حقتهم ومشغلين حقهم الدخاخين بس في الشوارع الرئيسية لكن جوة الأحياء والأزقة اللي فيها مويات ومستنقعات يفتح الله الأوادم وجوههم وأجسامهم حمرت من كتر قرص الناموس اللي عايش في هادي المويات والمستنقعات هدا غير الدبابين اللي شايفة شغلها صح ما تحس فيها إلا وهيه تززززن جوة أذنك عشان كده بقول يا أمانة جدة الحقينا ورشوا الحارات والأزقه قبل ما تجي الفاس في الراس ويروحوا الأوادم فطيس وانتو عارفين انه نحنا في أيام شتاء والأمراض والفيروسات بتنتشر من كتر هدا الإهمال اللي بنشوفوا وشوفوا حل كمان لهادي المويات والمجاري اللي بهدلتنا وبهدلت أهل جدة لكن ايش نقول إلا وا أسفاه على جدة.. وعيشوا كتيييييير تشوفوا كتيييييير.
abofatoo@hotmail.com
6764070
للتواصل ارسل رسالة نصية sms إلى الرقم 88548 الاتصالات أو الرقم 636250 موبايلي أو الرقم 737701 زين تبدأ بالرمز 150 مسافة ثم الرسالة