زمزم كديّ

بالبلدي الفصيح

أول شي أحب أبارك لكل الاتحاديين لعيبة وإداريين وجماهير بفوزهم بكأس الملك للأبطال وأقول لكل الهلاليين هارد لك وغيرها في غيرها، وتاني شي أحب أقول للحبايب لغز لأنهم دايما بيرسلوا ايميلات ويبغوا لغز من ألغازنا الحجازية الحلوة، عشان كده خلوكم معايا ونشوف ايش بيقول لغزنا اليوم (طويل ومعوج، أو قصير ودبدوب، يمكن تحبه وفيك يدوب، يبان على توبه شي يستخدم للحروف، زي الدموع يموت عندك لو جلس أكتر من أسبوع ).. والشاطر يحلوو.. ودحين تعالوا ندخل في هرجتنا.. دحين انت قلت حتجيب جوالين الزمزم وتجي قوامن راجعلي وتوبك مشقشق وعمامتك مشعترة ايش اللي صار؟ ياستي من كتر الغشنة وزحام الأوادم اللي في زمزم كدي صارت مضاربة وزي منتي عارفة سويت فيها أبو عرام وجلست أفارع بينهم وفين يوجعك وعاد الحبايب اللي هناك ماشاء الله عليهم مفتلين ومافي إلا ركب وأبكاس وأنا أقولهم يا جماعة أنا مالي شغل أنا جي أفارع ومافي فايدة وفين يوجعك وماصدقت أخرج من بينهم وهدا اللي كسبناه التوب اتشقشق والعمامة اتشعترت.. طيب وجوالين الزمزم اللي قلت حتعبيها فينها ؟ أقولها كنت حروح في خرخر تقولي فين الجوالين هيه الجوالين أهم مني، وبعدين أنا ماني عارف هادول اللي ماسكين زمزم كدي حاطين وقت معين عشان الأوادم تعبي زمزم ليه وعشان إيه فارضين وقت من الساعة سبعة الصباح للساعه 12 الظهر ليه وهما شايفين الزحمة والغشنة اللي بتصير ليه مايكون الوقت 24 ساعة ايش اللي يمنع خايفين إنه موية زمزم تخلص أبشركم ما حتخلص هدا نهر جاي من الجنة يعني عاجبكم الطوابير اللي بتحصل كل يوم هدا غير إنه مكان الطوابير مافيه مظلات ولا كراسي والأوادم تصقع فيهم الشمس لما تحرقهم هدا غير السوق السوداء اللي جنب زمزم لما تجي تسأل الحبايب اللي ماسكين هدا السوق بكم الجالون أبو 20 لتر؟ يرد عليك بعيون قوية الجالون ب 25 ريال، طيب ليه كده؟ ليه ما يكون في تنظيم عشان كل واحد يعبي جالونه براحتو، وليه كمان ما يكون في عمالة تشيل هادي الجوالين للناس لأنه في كتير من اللي يبغوا يعبوا زمزم كبار في السن من الرجال والحريم اللي ماشين بعربياتهم وعكاكيزهم ليش ما نرحمهم ونعبيلهم جوالينهم وهما مرتاحين.
أنا أتمنى من كل قلبي إنه مايكون في زمزم كدي وقت مفروض ومحدد على الناس، ياريت يكون الوقت مفتوح 24 ساعة وصدقوني زمزم ما حتخلص بس انتو صفوا نياتكم وهيه تمشي، وياريت كمان يكون في تنظيم ومظلات وكراسي عشان الأوادم تاخد راحتها وهيه مستنيه دورها، وياريت كمان نخلي بالنا من الرجال والحريم الكبار في السن ونحاول قد ما نقدر نعبي جوالينهم ونكسب فيهم الأجر ونخليهم يدعوا لنا بدل ما يدعوا علينا، والأهم من ده كلوو ياريت يكون في متعهد يقوم بتأمين وتعبئة جوالين زمزم للأوادم بسعر معقول لأنه مو معقول يكون جالوني معايا وأدخل في مضاربة وغشنة عشان أعبي جواليني، وإذا ما قدرت أروح أشتري من بياعين زمزم اللي في الطريق، والله عالم هوه زمزم والا خدني جيتك، عشان كده بتمنى انه يكون في نظام للأوادم اللي يبغوا يعبووا زمزم عشان تمشي الحكاية من غير غشنة ولا مضاربة، وما يحصل للحبايب اللي يبغوا يعبوا زمزم زي ما حصل لحبيبكم أبو فتوو... وعيشوا كتيييييير تشوفوا كتيييييير.
!!Article.extended.picture_caption!!