واحد ملبلب

بالبلدي الفصيح

شي مو معقول اللي جالس يصير زحام في كل مكان البلد صارت مخنوقه زحام في الشوارع زحام في الأسواق زحام في المراكز التجارية وكله كوم وزحام بياعين الفول كوم تقول هوه الأوادم ما تاكل فول إلا في رمضان بس بيني وبينكم سفرة الفطور من غير العمدة ما لها طعم عشان كده رايح أحكيكم عن الفول واللي صار فيه.. صليت العصر ونزلت على السوق عشان أشتري شوية عازات قالتلي عليها أم فتو وانا بألف وأدور في السوق إلا وجرس الجوال يرن برسالة مكتوب فيها لا تنسى تجيب معاك عمدة السفرة.. ورايا ورايا حتى بالجوال يا أم فتو المهم اشتريت العازات وأخدت بعضي ورحت على الفوال وسيارات واقفه على الشارع ومعطلة الحركة وأوادم رايحة وجاية وجات عيني على الساعة كان باقي نص ساعة على المغرب ودخلت في معمعة زحمة الزباين اللي يقول بريالين فول سادة واللي يقول بتلاته ريال فول والسلطة براني واللي يبغى فول من غير طحينة هادا غير الزحمة اللي عند فرن التميس اللي يبغى بالسمن واللي يبغى طايفي واللي يبغى بسكوت وسمعت واحد ورايا يقول للفران جهز واحد ملبلب على بال ما آخد الفول وأشوف العالم كل ما لها تزيد عند الفوال والأصوات تزيد يابويا مشينا المغرب ح يأدن يابويا أنا الأول يابويا أنا قبله وما تسمع إلا أصوات الزبادي تتصاقع مع بعض وشويه أشوف اثنين دخلوا في بعض واحد يقول للثاني أنا جيت قبلك رد عليه وقال له انت جاي من بره ما كنت ماسك سرا وكلمه من هنا وكلمه من هنا وما في إلا رديح وقعدوا يسبوا بعض والعالم ترد عليهم ياهوه ما يصير كده رمضان كريم لا تجرحوا صيامكم ما في فايده كل ما لها الغشنه تزيد واتشابكوا مع بعض وعيونك ماتشوف إلا النور وفين يوجعك وما تشوف إلا هدود وركب وأبكاس وقعدت العالم تفارع بينهم ودخلت أنا معاهم ياهوه ما يصير كده روقوا المنقا وقعدت أفارع بينهم ويارتني ما تلقفت لانه والغشنه شغاله جاني بكس خلاني أشوف سفرة الفطور قبل ما تنحط المهم خلصت الغشنه وأخدت زبدية الفول وجيت أبغى أحاسب الفوال حطيت يدي في جيب التوب اليمين عشان أطلع المحفظه ما حصلتها قلت يمكن في جيب التوب الشمال برضو ما حصلتها لا هيه ولا الجوال قعدت أدور يمين شمال ما في فايده والفوال يقوللي الحساب رديت عليه وقلت له ابلع ريقك شويه المحفظة والجوال انسرقوا سألت الزباين ياحبايب أحد شاف محفظه وجوال مرميه هنا والا هنا اللي يقول دووور مزبوط واللي يقول ربنا يعوض عليك واللي يقول حتى في رمضان في عالم ما تخاف الله تسرق وهيه صايمه ... المهم قلت للفوال بكره أمر عليك واحاسبك المهم أخدت بعضي وجيت راجع للبيت وهزيت رقبتي يمين وشمال وقلت حتى في نهار رمضان سرقة .. ياللا ربك يعوض من عنده ورمضان كريم وعيشوووا كتييييير تشوفوووا كتييييير.
للتواصل ارسل رسالة نصية sms إلى الرقم 88548 الاتصالات أو الرقم 636250 موبايلي أو الرقم 737701 زين تبدأ بالرمز 150 مسافة ثم الرسالة