بدل دوار خلوه دويرة

بالبلدي الفصيح

صحيت من النوم على زعيق ام فتو ... يبو فتو ... يبو فتو اصحى كفاية نوم صلاة المغرب ح تفوتك، طيب حاضر ... فتحت عيوني بالعافية وقعدت اتثاءب على الفراش وبعد ما طقطقت جسمي أخذت بعضي ورحت على بيت الماء عشان اتوضأ لصلاة المغرب، وأنا بتوضأ سمعت بنتي فتو تزعق ... الحقني يبويا ... الحقني يبويا ... امي اتزحلقت في المركب (المطبخ) . واخرج من بيت الماء جري بعدما اتوضيت ودوغري ع المركب .. واحصل ام فتو مرمية على المطبخ واسمعها تقول.. آه يا ظهري .. آه يا رجلي سلامتك سلامتك هو ايه اللي حصل؟ دخلت المطبخ عشان اسويلك الشاهي المنعنش عشان تشربه بعد صلاة المغرب زي العادة وما أدري بنفسي الا وأنا انبرش داك الانبراش من أول المطبخ لأخره ... آه يا ظهري ... آه يا رجلي، طيب ... وريني كده خليني اشوف .. لا الحمد لله .. الحمد لله .. ما في لا كسر ولا شعر بس هادا كله من فجعة الانبراش ودحين قومي جهزي الشاهي ترى ما قدامك الا العافية ... وأنا خارج من المطبخ سمعت إقامة صلاة المغرب قلت لأم فتو أنا رايح اصلي تبغو شي من بره؟ . آه يا ظهري .. آه يا رجلي .. سلامتك يبو فتو .. بس لا تنسانا من دعواتك. ولسه جيت ابغى اخرج الا واسمع بنتي فتو تقول: يا بويا ... يا ابويا لاتتأخر ابغى اروح انا وانتا مشوار.. يا فتو حرام عليكي انا شارد من امك تطلعيلي انتي .. فين تبغي تروحي؟ لما ترجع من الصلاة اقولك .. ودخلت البيت بعد ما صليت المغرب وجلست اشرب الشاهي ورجعت سألت فتو ما قلتيلي فين تبغي تروحي؟ ابغى اروح حي الجامعة عشان اصور شوية أوراق عشان زي ما انت عارف يا ابويا الاختبارات قربت. طيب .. حاضر .. اخلص بس من شرب الشاهي ونمشي.. وركبنا السيارة وانا ماشي في شارع با خشب وصلت لين دوار الجامعة بعد ما لفيت لفة طويلة عريضة الا والاقي هاديك الزحمة .. سيارات من اليمين وسيارات من الشمال وسيارات من اول الشارع وسيارات من آخر الشارع والشارع مشعتر من كل جهة والمشكلة الكبيرة في دوار الجامعة اللي ما منه فايدة اخذ مساحة الشارع كله بالطول وبالعرض والمشكلة التانية انه ما في عسكري واحد واقف ينظم حركة السيارات بعدين الاوادم كترت والسيارات زادت ليش ما يكون في رصيف صغير على امتداد الشارع والا يكون في دوار صغير .. كل السيارات داخلة في بعضها واللي يبغى يعدي لازم يغمز والا يأشر للسيارة اللي قدامه ويا ويله اللي ما يفهم في لغة الغمز والإشارة يا سيارته ح تتبهدل بهدلة .. المهم خرجت من هاديك المعمعة بسلام وقعدت ألف وأدور بالسياره لين حصلت موقف وقفت السيارة فيه ونزلت انا وفتو من السيارة عشان نصور الأوراق حقتها وانا ماشي انا وهيه كعابي الا وانشوف هاديك الزحمة اللي في جوة سوق الجامعة سيارات واقفة على الجنبين وسيارات داخلة وسيارات خارجة والشارع ملخبط منت عارف راسه من رجوله هدا غير الزحمة اللي بيسببها مستشفى حي الجامعة وجعانين داخلين ووجعانين خارجين. قعدت اضرب كف بكف وأسأل نفسي ليه ما يسووه طريق واحد داخل وطريق واحد خارج عشان تتنظم الحركة مو بس كده حتى السيارات اللي واقفة داخل السوق يمنعوها من الوقوف عشان تتنظم حركة السير وبلاشي من هادي البهدلة ووجع الدماغ اللي بيشوفوه الناس كل يوم وكله من تحت راس دوار الجامعة اللي ما له داعي من وجوده وعيشوا كتييييييير تشوفوا كتييييير
abofatoo@hotmail.com
فاكس/ 6764070
للتواصل ارسل رسالة نصية sms إلى الرقم 88548 الاتصالات أو الرقم 636250 موبايلي أو الرقم 737701 زين تبدأ بالرمز 150 مسافة ثم الرسالة