خرجت من المسجد بعد صلاة العشاء وركبت سيارتي وراجع للبيت ولسه ابغى اوقف السيارة إلا وتجي عيني على عم معتوق وهوه طالع لبيته وكان شايل في يده ملف علاقي «هدا الملف العلاقي الاخضر له ذكريات وحكاوي مع كل آدمي ما تقدر تقدم على وظيفه الا بملف علاقي اخضرما تراجع دائره حكوميه او شركه الا بملف علاقي اخضر وياريتها تزبط معاهم وفي النهاية يكون مصير الملف العلاقي الاخضر في براميل الزباله) ما علينا خلينا نرجع لهرجتنا المهم قلت لعم معتوق ايش هادا الملف العلاقي وعشان إيه ؟ بكرة يبو فتو رايح اودي الحرمة للمدرسة عشان نسجل البنت الصغيره وتعرف لازم نجهز الاوراق المطلوبة ونحطها في الملف العلاقي.. يا عم معتوق الله يهديك ويصلحك ما في داعي انك تروح وتتبهدل وتتهجول دحين عن طريق النت تقدر تسجل البنت وفي أي مدرسه تبغاها تعال بس نشرب الشاهي المنعنش في البيت ونسجلها انا وانت عن طريق النت ولا توجع راسك ولاتتمشور وترتاح من حكايه الروحه والجيه.. والله زمن يبو فتو صرت تعرف تلعب على الكمبيوتر ده وانت يادوب كنت تعرف تلعب كيرم ... صار كده يا عم معتوق برضو يا سيدي مقبوله منك خلينا بس نسجل البنت ونلعب بعد كده قيم كيرم ونشوف مين حيكسر راس التاني المهم بعد ما شربنا الشاهي المنعنش قلت لعم معتوق.. شوف يا سيدي تدخل على الموقع ده www.jgedu.gov.sa حتفتح لك صفحه تسجل فيها كل البيانات اللي تخصك وبعد كده تحتفظ بالرقم السري اللي انت حطيتو عشان تقدر تدخل على بياناتك بالرقم السري اللي انت كتبتو بس يكون في علمك لازم تكون كل البيانات صحيحه لانه بعد كده ح يطابقوا البيانات اللي موجوده في صفحتك اللي في الموقع مع الاوراق اللي موجوده في الملف عشان كده لازم تكون كل البيانات اللي تسجلها صحيحه وتختار المدرسه اللي تبغاها والقريبه من بيتك ولازم يكون سن البنت سته سنوات بالزبط مع بدايه الدراسه والا ما حيقبلها الجهاز مهما حاولت وبعد ما تنتهي من عملية التسجيل حتجيك رسالة بعد كم يوم على جوالك او ايميلك انه البنت انقبلت وبعد كده تاخد الحرمة وتعطيها الاوراق عشان تقدمها للمدرسه اللي انتو سجلتوا فيها وترتاح من الهجولة ووجع الدماغ لانه بيني وبينك الحبايب في تعليم البنات شغالين على قدم وساق زي ما بيقولوا اصحاب اللغة العربية على تطوير التقنية عشان تخدم شريحة كبيرة من المواطنين والمقيمين عشان لا يتعبوا في حكاية تسجيل بناتهم المستجدات او اللي يبغوا ينقلوا على مدارس تانية تكون قريبه من بيوتهم هدا غير التطوير اللي بيصير عندهم في كل المجالات اللي تخصهم وتخدمهم في عملهم، لانه صار عندهم البريد الالكتروني اللي بيخدم جميع موظفي الادارة والمدارس ومراكز الاشراف ولكل موظف اسم مستخدم وكلمة مرور هدا غير خدمة التعاميم اللي بتوصل على كل المدارس التابعة لمحافظة جدة وعندهم منتدى بيخدم شريحة كبيرة من المشاركين اللي بيقدموا توصياتهم وارائهم هدا غير انه عندهم خدمة الانترنت لكل موظف يحب يتصفح النت وبصلاحيات معينة هدا غير الارشفة الالكترونية اللي بتساعدهم كتير في شغلهم بدل الشغل القديم اللي كان متعبهم لما يبغوا يدوروا على المعاملات دحين بضغطة زر تطلع أي معامله هدا غير خدمة ربط مراكز الاشراف التربوية والمستودعات وبرنامج الرواتب وكل شي يخص الموظفين عشان يشوف الموظف اللي له واللي عليه من رواتب وحسميات واجازات وهدا كله بفضل الجهود الكبيرة اللي بيقوموا بيها الاخوان في ادارة تقنية المعلومات وبمتابعة وتوجيهات عبد الكريم الحقيل مدير عام تعليم البنات وزملائه الكرام اسأل الله سبحانه وتعالى ان يوفقهم ويعينهم ويجعل كل الجهود اللي بيقوموا بيها في ميزان حسناتهم وعيشوا كتيييييير تشوفوا كتييييير. [email protected] فاكس: 6764070 للتواصل ارسل رسالة نصية sms إلى الرقم 88548 الاتصالات أو الرقم 636250 موبايلي أو الرقم 737701 زين تبدأ بالرمز 150 مسافة ثم الرسالة
