قبل لا ادخل في الهرجتين حق اليوم احب ارجع الحبايب المعتقين اللي يحبو حكاوي زمان واقولهم .. مين فيكم لسه يتزكر اللدو وحلاوة السكر وجرين دايزر والرجل الاخضر والمدريهة والكونكان .. مين فيكم لسه بيتزكر في رمضان برنامج ام حديجان والا فريق الوحدة زمان ايام السبحي ولطفي لبان .. ومين فاكر اكل المنفوش والشاهي ابو فتلة والدوش واللي في جيبو تلاته قروش وعامل نفسة سوبرمان .. مين يتزكر لعب البربر ولعب الفرفر واللي يخاصم واللي تبربر وعيون بتبصبص من الروشان ... ياسلاااااام ايام ياريتها ترجع لكن ياخساره عمر اللي راح مايرجع ايام زمان ... ودحين ندخل في هرجتنا الاولى .. وانا خارج من الجريدة وماشي برجولي في امان الله الا ما الاقي الا ويد زميلنا اشرف الشريف كافشتني من رقبتي واسمعو يتكلم بالجوال ويقول يا أم هاشم جهزي الغداء انا جي ومعايا ابو فتو جهزي السفرة حاولت اعتذر ودخيلك حروح اتغدى في البيت مافي فايدة مالقيت نفسي الا وانا راكب سيارته ووصلنا بيت اخينا الا والاقي السفرة جاهزه وحوالينها نبيه الهندي وعبدالمنعم الهجيني وحسن النجار قلت ماشاء الله الحبايب اتكفشوا من رقبتهم زي والا ايش الحكاية المهم جلست على السفرة وجات يدي على قدر شكلو كده اسطواني واتلسعت منه لسعه كان حار زي الجمر سألت ايش هدا يا اشرف قال هدا المغش ... نعم يخويا (مين غش مين) .. يبو فتو انا حشرحلك السفره شوف ده المغش اللي هوه عباره عن قدر مصنوع من الحجر يطبخوا فيه اللحم والخضار من باميه وكوسه وفاصوليا وهادي عصيدة العكيد بالسمن والعسل وهادي المرسه بالسمن والعسل والموز وفطاير البر زي المعصوب عندكم وهدا لحم الميفا وهدا الرز اكيد تعرفه وهادي الحلبة اللي حتزحلق بيها الاكل وقول بسم الله .. بيني وبينكم اكلت لمن انبشمت من جد كانت سفره جيزانية محترمه المهم وانا خارج من بيت زميلنا اشرف قلتلوا لا تنسى بكره تكفشني من رقبتي عشان نجيك تاني ضحكنا البشكه مع بعض وقلنالوا سفره دايمه ... تعالوا دحين ندخل في هرجتنا الثانية انت يبويا جي يد وراء ويد قدام فين المقاضي؟.. أي مقاضي محد كلمني وامك ما كتبت اللسته حقتها زي العادة .. من جد أمي نسايه يبغالنا نشتكيها على لجنة الانضباط .. قصدك عمتي وعمي .. يابنتي هية جات على أمك يبغالنا لجنة انضباط كل مكان يبغالنا لجنة انضباط في المحاكم عشان نشوف حكاية تأخير الأحكام ويبغالنا لجنة انضباط في هيئة الأمر بالمعروف عشان نشوف حكاية المصايب اللي جالسة تصير في البلد هادي الايام ويبغالنا لجنة انضباط في سوق الاسهم عشان نشوف دبره في حكاية الأسهم وطلوعها ونزولها ويبغالنا لجنة انضباط في حلقة الخضار عشان نشوف حكاية هادول العمال اللي ماسكين الحلقة بالطول والعرض ويبغالنا لجنة انضباط في مكاتب العمل والعمال عشان نشوف حكاية السعودة اللي بنقراء عنها بس وكلها حبر على ورق ويبغالنا لجنة انضباط في الأمانة عشان نعرف راسنا من رجولنا من هادي المشاريع الوهمية ويبغالنا لجنة انضباط في كتابة العدل عشان يعرفوا الناس اراضيهم من اراض الهوامير ويبغالنا لجنة انضباط في الاتصالات عشان نعرف انه هادي الفواتير اللي جالسين ندفعها صحيحة والا الحكاية (خدني جيتك) واشياء كتيره يبغالها انضباط. وعيشو كتيييييير تشوفو كثييييييير. للتواصل ارسل رسالة نصية sms إلى الرقم 88548 الاتصالات أو الرقم 636250 موبايلي أو الرقم 737701 زين تبدأ بالرمز 150 مسافة ثم الرسالة
