قامت الدنيا وقعدت على رأس البلا والفتنه جهاز البلاك بيري ياسبحان الله أي شي فيه مسخرة وقلة حياء بعض الاوادم تدورلوا والا ايش الفايدة منه لما يكون في يد مراهق والا مراهقه والا حتى شباب او بنات اتعدوا سن المراهقه والله ما منه الا اللي بالي بالكم طق حنك وتدييييت وانتو ادرى بالباقي عشان كده بقول لكل أب ولكل أم خافوا الله في بناتكم واولادكم والله العظيم ربي حيسألكم ويحاسبكم عن هادي الامانه يوم الدين يقول الله سبحانه وتعالى في محكم التنزيل ((إن الذين يحبون أن تشيع الفاحشة في الذين آمنوا لهم عذاب أليم في الدنيا والآخرة والله يعلم وأنتم لا تعلمون)) ما علينا كل مين بعقله يعيش الحجر من الارض والدم من راسكم ... اليوم يا حبايب تالت ايام رمضان وزي منتو عارفين ايام رمضان بتمشي زي الصاروخ عشان كده احب اقول ياريت نجتهد شويه في هدا الشهر الفضيل لانه بصراحه ايام رمضان ايام حلوه ومباركه فياريت نستغلها قد ما نقدر مو تكونوا متحمسين في اول الشهر وبعد كده ما تقوموا للصلاة الا بالعافية عشان كده ابغى اقولكم هرجة مهمه لا يضحك عليكم (عمدة السفرة) وابو المشاكل في رمضان من كتر ما تطيحووا فيه وقت الفطور وحاولوا قد ما تقدروا انكم تشتروه من بدري عشان لا تجرحوا صيامكم من كتر الزحام اللي عند اصحاب الفول على العموم بالعافية على صحتكم وقلوبكم وتعالوا دحين ندخل في هرجتنا حق اليوم بس قبل لا ادخل في الهرجه اتمنى من الحبايب انهم ما يضايقوا او بزعلوا من الكلام اللي حقولوا ويقولولي انت ايشلك شغل مالك صلاح سيب العالم في حالها ودحين تعالو نشوف الهرجة ايش بتقول .... انا ابغى اعرف انت من ساعة ما رجعت من صلاة الجمعه وانت زعلان ومتعككن ايش اللي حصل ؟، اصلك انتي منتي عارفه ايش الحكاية ؟ ايش الحكاية يا سيدي فهمني ؟ انا اقولك يا ستي اليوم زي منتي عارفه كانت اول جمعه في رمضان واول ما سلم الامام خرجوا المتسولين من كل صف من المسجد وجلسوا يتكلموا ويتباكوا وبعد كده كل واحد منهم مسك باب من ابواب المسجد وشوفي عاد الحبايب اللي يرمي خمسه واللي يرمي عشره وفي واحد بالمره طيب رمى ميه ريال، ميه ريال مره وحده، ايوه يا ستي ميه ريال عشان تعرفي انه الحبايب قد ايش طيبين بس قاعدين يتصدقوا على عالم هادي هيه شغلتهم ما عندهم الا شغله التسول وفي رمضان كمان تزيد اعدادهم لانه بعض ضعاف النفوس اللي بيجوا من بلادهم عشان ياخدوا عمره يستغلوا جيتهم لمكه المكرمة ويقلبوها شحاته وزي ما بيقول المثل (حج وبيع سبح) المهم انه كل ما تدخل مسجد عشان تصلي فرض من الفروض واول ما يسلم الامام تلاقيهم واحد ماسك الجناح اليسار والتاني ماسك الجناح اليمين عشان كده بيقولوا عليهم محترفين تسول والحمدلله انه ما كان في راس حربه والا كانوا جابو العيد هدا غير الحريم والاطفال اللي بيكونوا جالسين بره المسجد صار الواحد ملخبط منت عارف هما دول المتسوليين يستحقوا الصدقه والا ما يستحقوا والمصيبه كمان انهم كتروا في البلد يعني بالبلدي كده بعد كل فرض صلاه تلاقيهم بره المسجد وتلاقيهم وانت في السوق لما تبغى تشتري عازات بيتك لا وفي منهم كالحين بيدقوا على بيبان البيوت عشان كده احب اقول لكل الحبايب خلووا بالكم منهم هدا غير انك تلاقيهم بره المراكز التجارية وتلاقيهم عند اجهزة الصراف وتلاقيهم عند محطات البنزين .. منتشرين في البلد زي الدووود حتى عند اشارات المرور تلاقيهم وياريتوا كمان في النهار لا الورديه شغاله عندهم 24 ساعه تلاقي في نص الليل كل اربعه حريم ماسكين تقاطع وشوف عاد الشغل على ودنو عشان كده بقول يا مكافحة التسول واللي المفروض تغير اسمها وتصير (حمابة التسول) شوفوا لنا صرفه في العالم دي لانه حالهم زاد وغير كده انهم شوهوا منظر البلد وانتو يا حبايب اتصدقوا للناس اللي تستحق والجمعيات الخيريه والاربطة والمساكين المتعففين يا كترهم في البلد واللهم اني صائم وعيشوا كتيييييير تشوفوا كتيييييير [email protected] للتواصل ارسل رسالة نصية sms إلى الرقم 88548 الاتصالات أو الرقم 636250 موبايلي أو الرقم 737701 زين تبدأ بالرمز 150 مسافة ثم الرسالة
