الأمانة والبسطات

بالبلدي الفصيح

اليوم أحب أقول لكل الحبايب كل عام وانتو بخير وصحة وسلامة وعيدكم سعيد ودحين تعالوا ندخل في هرجة اليوم.. ايش اللي جايبك من البسطة كده بدري ؟ كل سنة بتجي بعد صلاة العيد من البسطة؟ خليها على الله يا أم فتو الحبايب حقون الأمانة لا يرحموا ولا يخلوا رحمة ربنا تنزل.. ليه هوه ايش اللي صار؟ قولي ايش اللي ما صار.. أصلك منتي عارفة ايش الحكاية؟ ايش الحكاية يا سيدي فهمني؟ أنا أقولك ياستي لما جات الساعه 2 في الليل من ليلة العيد طبووا علينا الحبايب حقون البلدية وما تسمع إلا زعيقهم حتى سلام ربنا ما نطقووه (اعطيني رخصة البسطة ويللا يا أخينا رفع بسطتك) والأوادم والزحمة زي منتي عارفة كيف بتكون في ليلة العيد وكل الزباين حولين البسطة وجلست أترجاه تكفى دخيلك نمشي البضاعة اللي دافعين فيها دم قلبنا ما في فايدة مصممين على كلامهم قالوا حنعطيك مهلة ساعة زمان يا تشيل بسطتك يا نقلبها عليك فوقاني تحتاني قلت في نفسي أمري لله وحسبي الله ونعم الوكيل وما جات الساعه اللي قالوا عليها إلا وأنا مرفع بسطتي والبضاعة اللي اشتريناها زي ماهية.. طيب ليه يا سيدي هما بيعاملوا أصحاب البسطات بالشكل ده وهما عارفين انه الليلة عيد؟ والله يا ستي علمي علمك من بداية ما قدمنا على رخصة البسطة في نص شهر شعبان وهما مخرجين عيوننا عبي الاستمارة وراجعنا بعد أسبوع عشان تحضر القرعة طيب مو العام اللي فات حضرنا القرعة وعرفنا مكاننا فين؟ ايش لزمة القرعة السنة دي ولما تبغى تجي تستلم رخصة البسطة يقولك لا مو من حقك تستلمها دحين تعال في 20 رمضان واستلمها لانه التعليمات بتقول كده لانه بسطتك أجبان ومخللات هدا غير انه في أصحاب بسطات لهم 30 سنة و40 سنة وهما بيبسطوا في أماكنهم وفوق كل ده ما في تقدير لهم هدا غير انهم زودوا على أصحاب البسطات الرسوم يعني العام اللي فات كانت الرسوم خمسمية ريال والسنه دي خلوها بالف وخمسمائة ريال واللي عنده واسطة يزحلقووه ويدفع نص المبلغ أنا ماني عارف ليش الأمانة تحب تعكنن على أصحاب البسطات بالشكل ده وهما عارفين انه هادي عادة سنوية للبلد ولأهل البلد وهادي ليله عيد وعادة سنوية يعني أغلب أهل البلد بيشتروا مقاضيهم من أصحاب البسطات سواء كانت بسطات عطورات أو حلويات العيد أو بسطات الجبنة والزيتون والأمبا لكن ايش نقول هادي الأمانه وهادي عاداتها وهدا كلام صاحب بسطة مقهور. وعيشوووا كتييييير تشوفوا كتيييييير.
هرجة:
قطع العادة عداوة يا أمانة جدة.
abofatoo@hotmail.com
للتواصل ارسل رسالة نصية sms إلى الرقم 88548 الاتصالات أو الرقم 636250 موبايلي أو الرقم 737701 زين تبدأ بالرمز 150 مسافة ثم الرسالة