لقيت عم معتوق فارش الزولية وجالس تحت باب العمارة ومسرح وبيضرب أخماس في أسداس وبيكلم نفسه وجيت جنبه ولسه أبغى أهرجه إلا وده بق فيا.. أبعد عني دحين يبو فتو العفاريت بتلعب قدامي وخلينا في ساعة رحمان أنا ماني فايقلك.. هيا خزاوة فيك طالما منت فايقلي ماني باعد ولا قايم وهادي جلسة كمان وما حقوم من مكاني إلا لما أعرف إيش الهرجة من طقطق لسلام عليكم.. يعني مصمم تعرف الهرجة؟ إيوة مصمم.. هيا خلي بالك معايا واسمع أنا إيش حقول وانت بعدين أحكم.. شوف يا سيدي أنا قلتلك قبل فترة إني اشتريت قطعة أرض في شمال جدة ودفعت فيها تحويشة ودم قلبي وقلت يا واد خليها كمان شوية على بال ما تجمعلك قرشين وتبنيلك على الأقل دور واحد وترحم نفسك من الإيجارات اللي قصمت ظهري وظهور الغلابا اللي زينا لأنه زي منت عارف مافي قانون ولا نظام يحمي هادا المواطن الغلبان من جشع وطمع هوامير العماير.. المهم يا سيدي اللي حصل إنه امانة جدة كملت الناقص ووقفت الخدمات عن 7250 قطعة أرض لأنه على حسب كلامها إنه هادي القطع موجودة على مجرى سيول شايف كيف (أحر ما عندنا أبرد ما عندها) هادي هية أمانة جدة اللي عندها مبنى من 20 دور.. هادي هية الأمانة اللي عندها دكاترة ومستشارين ومهندسين مدنيين ومهندسين جولوجيين يعرفوا إذا كانت هادي المخططات وراها مشاكل والا لا .. هادي هية الأمانه اللي عندها خرائط ومستندات تعرف منها إن كان هادي المخططات موجودة على مجرى أودية وسيول والا لا؟!! لكن هادي هيه الأمانه تسكت الييين تجي الفاس في الراس وبعدين تهرج بعد ما تكون حرقت دم الغلابا اللي اشتروا في هادي المخططات والمفروض إنها ما تعتمد هادي المخططات ولا تسفلتها ولا ترصفها ولا تبيعها على هوامير الأراضي بصكوك شرعية طالما عارفة إنه هادي الأراضي موجودة على مجاري سيول وأودية لكن طالما الحكاية (امسكلي واقطعلك) هيا بالله عليكم من يعوض هادول الغلابا اللي اشتروا في هادي المخططات من كدهم وعرق جبينهم ودم قلبهم عشان يبنوا بيوتهم ويعيشوا مستورين.. فينها ما تحركت وشافت حل لهادي المخططات قبل ما تبيعها على هوامير الأراضي اللي ما يخافوا الله في عباد الله، فينها ما تحركت وشافت حل لهادي المخططات قبل ما يورطوا الغلابا اللي اشتروا فيها.. وبعدين هيه جات على هادي المخططات بس.. كل المخططات الجديدة والقديمة اللي في جدة بتغرق من الأمطار يعني ما في فرق ما بينها وبين الأحياء العشوائية .. الشوارع بتغرق والكباري بتغرق واللي يضحك كمان إنه الانفاق والكباري اللي افتتحوها في الصباح قفلوها في الليل لأنها اتعبت مويات، بالله عمركم في حياتكم شفتوا أنفاق ما يكون فيها تصريف لمياه الأمطار؟ لكن هادا كله ببركة المقاولين اللي جالسين يلطشوا المليارات وكل شغلهم (طبطب وليس يطلع كويس) هدا غير الغلابا اللي اتبهدلوا وغرقت بيوتهم وسياراتهم وكله ببركة مشاريع تصريف مياه الأمطار اللي بنسمع عنها من 30 سنة وما في شي على الواقع وكل الحكاية حبر على ورق .. هيا بالله مين يعوض هادول الغلابا على المصيبة اللي جاتهم معقولة الأمانة عندها استعداد إنها تعوضهم عن اللي خسروه ما اعتقد لأنه الأمانة ما تعرف تعوض لكن تعرف تورط وحسبي الله ونعم الوكيل .. تركت عم معتوق ودمعته على خده وأنا أضرب أخماس في أسداس وما عندي شي اقولوا إلا لا حول ولا قوة الا بالله و عيشوا كتييييير تشوفوا كتييييير مثل حجازي البيض الفاسد يدحدر على بعضه هرجة جات الأمطار وكشفت المستور وبينت الخافي سبحانه يمهل ولا يهمل
