الكهرباء وكورجة طراريح

بالبلدي الفصيح

شوفي يابنت يافتو مين اللي جالس يرزع الباب برجولو .. أفتحوا الباب ياناس راسي حينفلق من كتر شيل الكراتين حسبي الله على الشياطين .. دحين أنا أبغى أفهم أنت جايب معاك كل هادي العازات ليه، تنكة قاز وكرتون شموع ومراوح سعف وكورجة طراريح عشان إيه هدا كلو ياسيدي ؟ هدا ياستي عشان لما تنقطع الكهرباء على جدة وسكانها يكون في البديل لأنه الوزير حق الكهرباء رجع في كلامه وقال يا جماعة الخير خلو بالكم ترى التصريح اللي قلتو قبل كم شهر كان فشنك والكهرباء حتنقطع يعني حتنقطع واللي عاجبو عاجبو واللي مو عاجبو ينتف حواجبو عشان كده أنا اشتريت العازات هادي القاز عشان تعبي الدافور وتعرفي تطبخي عشان لا تنقطع الكهرباء ويخرب الأكل وهوه على البوتوجاز والشموع نستخدمها في الليل وبرضو احتياط لو انقطعت الكهرباء عشان أشوف طختك وطخة بنتك ومراوح السعف هادي عشان يدي ويدك تتكسرمن كتر ما نحركها وحتكون بدل المكيفات لما تنقطع الكهرباء وهادي الطراريح نستخدمها وقت النوم نبلبلها بالموية عشان نعرف ننام بدل ما يسلخنا الحر آخر الليل، وبعدين يكون في علمك لازم تطفي المكيفات واللمبات ولاتشغليها طول اليوم لأنه لو انقطعت الكهرباء والمكيفات شغاله حتنحرق الفيوز واللمبات وأحلمي إنه شركة الكهرباء حتعوضنا هدا غير اللحمة والدجاج والسمك وكل شيء موجود في التلاجة حيخرب وبرضو كمان احلمي انه شركة الكهرباء حتعوضنا، لكن حقهم الفواتير يا ويلك وياسواد ليلك لو ما سددت فاتورتهم ولا حيتفاهموا معاك على طول حيقطعوا الكهرباء وشوف عاد المناحلة ووجع القلب اللي حيجيك منهم ما حيرجعولك الكهرباء إلا لما تخرج عيونك وتتوسط عند زعيط ومعيط ونطاط الحيط، هدا بالنسبة للسكان الغلابا بس ما أدري هيه الكهرباء تنقطع في بيت الوزير زينا والا لا ؟. لكن تعالي للشركات والمؤسسات والمصانع الكبيرة والسوبرماركات وشوفي المصايب والخساير اللي بيخسروها بالملايين هدا غير المصايب والوفيات اللي بتصير في المستشفيات لما تنقطع عنهم الكهرباء وخاصة اللي موجودين في غرف العناية المركزة لأنهم حيروحوا فطيس وياعالم المولدات الاحتياطية حتشتغل والا لا. هدا غير إشارات المرور حتشوف العجايب لو انطفت الكهرباء عنها حوادث في كل شارع وتقاطع وبرضو شركة الكهرباء ما حتعوضهم، وكل اللي تقدر عليه حتقول لهم: ( مصو حمر ) لأنها شركة كهرباء وحدة في البلد ومافي أحد ينافسها، عشان كده بتقول بعنطزة وعين قوية: (يا أرض انهدي ما عليكي قدي) لكن لو في شركة كهرباء تانية حنشوف كيف حال أسعار الكهرباء حتتغير وكل شركة حتقدم الخدمة الطيبة عشان تكسب رضاء العميل، لكن ايش نقول إلا الله يعيننا على شركة الكهرباء واللي يجي منها، عشان كده بقول لكم قولوا معايا: يارب ارحمنا برحمتك .. وعيشوا كتييييييير تشوفوا كتييييييير.
هرجة/ شركة الكهرباء حترفع تسعيرة الكهرباء على التجار وطالما التجار شطار أكيد حيرفعوا الأسعار علينا وحيدفعوا قيمة فواتيرهم من جيوبنا، ونحنا مو ناقصين.. اللي فينا كافينا ياشركة الكهرباء.
للتواصل ارسل رسالة نصية sms إلى الرقم 88548 الاتصالات أو الرقم 636250 موبايلي أو الرقم 737701 زين تبدأ بالرمز 150 مسافة ثم الرسالة