دجاج فاسد..آآه يا بطني

بالبلدي الفصيح

اشبك يا سيدي كل شوية داخل خارج على الحمام، تسأليني أنا؟!! إسألي نفسك شوفي إيش هببتي في كبسة الدجاج إللي خليتيني أقرقع فيها لوحدي لا إنتي أكلتي ولا حتى بنتك. يا سيدي ما سويت شي هيه الكبسة إللي بسويها دايما وبتأكل أصابعك وراها كمان، أصابع إيه إنتي خليتي فيها أصابع إنتي خليتي عندي لياقة أحسن من لعيبة المنتخب من كتر ما ني قاعد أهرول على الحمام بطني قاعده تهرهر من بعد ما أكلت الكبسة حقك الله يسامحك يا شيخة تبغي تجيبي أجلي آآه يا بطني آآه يا بطني.. شوف يا سيدي مو هدا الدجاج إللي حضرتك جبتو من السوبر ماركت ؟هاتي أشوف وريني يا ساتر يا لطيف الله لا يباركلكم يا بعض أصحاب السوبرماركات ما تخافوا الله في عباد الله المصيبة في الدجاج، إشبو يا سيدي الدجاج؟ الدجاج منتهي له سنة وأنا اشتريتو وما انتبهت لتاريخ الانتهاء وخليت ثقتي بالسوبرماركت إللي دايما بنشتري منه أغراضنا الله يكافيكم من عنده، عالم ما تخاف الله، وما عندها ذمة ولا ضمير، الفلوس عمت بصايرهم وما تفرق معاهم ياكلوا حلال والا حرام وشوية أشوف فتو جية ومعاها الجريدة وبتقول شوف يبويا الخبر ده ايش بيقول «تسويق ثلاثة آلاف دجاجة فاسدة يوميا على متاجر ومطاعم شهيرة.. نجحت فرقة رقابية من بلدية بريمان أمس الأول في اكتشاف موقع لذبح الدجاج المريض والمجهول المصدر وتوزيعه على أسواق جدة بحجم يصل إلى ثلاثة آلاف دجاجة يوميا، وأتلفت الفرقة كافة محتويات الموقع وأغلقته نهائيا. وكانت بلدية بريمان تلقت بلاغا من أحد المواطنين يؤكد ملاحظته بوجود عدد كبير من الشاحنات الصغيرة تأتي في المساء إلى حوش كبير في أعلى وادي أم حبلين وتخرج محملة بمئات الكراتين، كاشفا أنه عندما حاول الاقتراب من الموقع لم يتمكن بسبب السياج الحديدي الذي يمنع اقتراب الغرباء، كما تضمنت شكوى المواطن أن الروائح الكريهة تسود في الموقع وتزكم الأنوف»، صار كده يعني لولا المواطن الشهم ده كانت البلد غرقت من الدجاج الفاسد وحيروحوا الأوادم فطيس والأمانة نايمة في العسل وجالسه تتفرج، فينها الأمانة وفين فرق التفتيش والمراقبة حقتهم ساكتين عن هادي المصايب والبلاوي اللي جالسة بتصير في البلد وبعدين ليه ما بتشهر بأصحاب المطاعم وأصحاب السوبرماركات اللي بتبيع هدا الدجاج الفاسد، وإلا قلبها عليهم والبني آدم ماله قيمة عندها، المفروض يكون فيه تشهير في كل الجرايد بالاسم والصورة لهادول اللي ما يخافوا الله في عباد الله سواء كانوا مواطنين والا مقيمين وتكون في غرامات كبيرة عليهم وينسجنوا سنين وتتقفل مطاعمهم ومحلاتهم عشان يكونوا عبرة لغيرهم لأنه حياة الناس مو رخيصة، وعشان يعرفوا كمان إنه هدا الدجاج الفاسد اللي جالسين يبيعوه ما يجي من وراه إلا الموت والمرض للناس، لكن كيف تفهم ناس ضمايرها ماتت ولا عندها خوف من رب العباد لأنه كل اللي يهمها كيف انها تاكل بالحرام، لكن ايش نقول الا عيشوا كتيييييير تشوفوا كتييييييير.
مثل حجازي: البيض الفاسد يدحرج على بعضه.
abofatoo@hotmail.com
للتواصل أرسل رسالة نصية sms إلى 88548 الاتصالات أو 636250 موبايلي أو 737701 زين تبدأ بالرمز 150 مسافة ثم الرسالة.