افطموهم

بالبلدي الفصيح

الحقي يا أمي الحقي يا أمي.. إيش في يا بت ربشتيني؟ الحقي شوفي أبويا إيش جايب معاه؟ تعالي شوفيه من الطاقة؟ وخري عني شوية خليني أشوف إيش جايب معاه الراجل ده، غنمة؟ وبقرة؟ إيش يبغى فيهم؟ لا وكمان جايب معاه الحشيش حقهم، أصلا أبوكي ده ما يبغى يروق أكيد وراه مصيبة؟ وشوية اسمع باب البيت ينفتح وينقفل عرفت أنه دخل البيت، دحين إنت جي البيت وجايب معاك غنمة وبقرة ليه؟ لا وكمان جايب معاك رضاعات للبزورة ليه ده كلوو يا سيدي؟ ما في فايدة دايما تستلمني من عند الباب فمها ولا ينطبق، قاعد تلغمط إيش تقول؟ ولا بلغمط ولا شي يا بنت الحلال روقي واستني وخليني اخد نسمي من طلعة الدرج، روقنا واستنينا اللهم طولك ياروح.. يا ستي الغنمة والبقرة حطيتهم في الحوش وكل يوم الصباح حروح أحلبهم وأعبي الرضاعات وأوزعها على الأطفال والمواليد اللي في عمارتنا وفي العماير اللي جنبنا عشان يشربوا حليب طازة لأنه يا ستي الحليب حق الأطفال واللي ينباع في الصيدليات وفي الدكاكين ارتفع سعرو العلبة الصغيرة اللي كانت ب40 صارت ب70 وغير كده إنه كل صيدلية بتبيع بالسعر اللي يناسبها وطز فيك انت يامواطن، عشان كده أنا جبت الغنمة والبقرة عشان الحبايب الأطفال يشربوا من اللي يعجبهم، وبعدين الحليب حقها فيه فايدة وطازة كمان وأحسن من الحليب المعلب اللي ما يجي منه إلا المرض وإن كان على الحشيش والشعير اللي بتقولي عليه ترى سعره مقدور عليه لأنه وزارة التجارة شاده حيلها فيه بتراقب التجار اللي بيزيدوا سعره وتشهر فيهم كمان، وهدا الكلام كان منشور في الجرايد قبل أسبوعين لما وزارة التجارة نزلت كم إعلان بتشهر فيه ببعض التجار اللي رفعوا أسعار الشعير، شايفة قد إيش وزارة التجارة طيبة وقلبها على الغلابا، يعني تركت أسعار الحليب وكل المواد الاستهلاكية اللي يحتاجها المواطن.
هرجة لكل الحبايب: هدا الرقم تقدروا تتصلوا عليه عشان تبلغوا عن ارتفاع الأسعار ضد التجار والمتاجر: 8001241616
abofatoo@hotmail.com
للتواصل أرسل رسالة نصية sms إلى 88548 الاتصالات أو 636250 موبايلي أو 737701 زين تبدأ بالرمز 150 مسافة ثم الرسالة.