زمان أيام دراستي الابتدائية والمتوسطة والثانوية كانت المقاصف بتقدم السندوتشات أشكال وأنواع اللي بالجبنة واللي بالبيض واللي بالتونة واللي يبغى يتفنجر يشتري سندوتش (حمص أو طعمية) والله يرحمك يا عم (علي) كان يدور علينا بالسندوتشات في الفصول وكانت صحتنا الحمد لله زي البمب وما كان عندنا عصيرات زي اللي موجودة دحين كان اللي موجودة قوارير مشروبات غازية عشان تزحلق اللقمة ... دحين في الوقت الحاضر تحزن على وضع المقاصف والمأكولات اللي بيقدموها للطلاب والطالبات وكله من تحت راس المتعهد اللي ما يهمه إلا قد إيش يلملم من الفلوووس مأكولات كلها مقرطسة ما لها لاطعم ولامعنى وكلها مأكولات مودرن زي ما بيقولوا اللي يقولك كراسون جبنة وإلا زعتر وإلا لبنة وياريتها طازة بالعكس عجاين كلها مقرطسة وبايتة من أسابيع هدا غير اللي بينباع في المقاصف المدرسية من شكولاتات وشيبس وحلويات وعصاير مكرتنة مصبوغة بطعم البرتقال والتفاح وكلها مأكولات وعصاير (تسمن) لكن ما تغني من جوع مأكولات أي كلام وطلابنا وطالباتنا مغلوبين على أمرهم لازم يشترون عشان يسكتووا جووعهم لأنه المتعهدين اللي ماسكين المقاصف زي ما قلنا ما يهمهم صحة أولادنا ولا بناتنا والله يرحم أيام زمان ومقاصف زمان .. أنا أتمنى من كل قلبي إنه الحبايب في وزارة التربية والتعليم يهتمون شوية بحكاية المقاصف المدرسية وتسوي اتفاقيات مع شركات غذائية ممتازة تقوم بتقديم وجبات الإفطار الصحية الغنية بالفيتامينات يعني بالبلدي كده تقوم بتقديم سندوتشات البيض المسلوق أو المقلي وسندوتشات الجبنة مع الزبدة أو المربى أو الجبنة البيضاء مع الزيتون أحسن مليون مرة من المعجنات المقرطسة اللي مالها لا طعم ولا قيمة عشان نحافظ على صحة طلابنا وطالباتنا وتتفق كمان مع شركات العصاير والحليب اللي منتجاتها طازة وموجودة في كل سوبرماركت لأنها كمان أطعم وأفيد مليون مرة من العصاير المكرتنة اللي كلها صبغات ومثبتات ومواد كيميائية وياريت يكون كمان في بكتات من التمور واللبن عشان تفيد طلابنا وطالباتنا في عافيتهم وصحتهم لأنه بيني وبينكم فقر الدم زاد عند طلابنا وطالباتنا وكله من تحت راس هادي المأكولات المقرطسة وعيشوا كتييييير تشوفوا كتيييير. - الأخ حامد من مكة وصلت الرسالة - الأخ: س . ع . ب أرجو الاتصال على الجريدة [email protected] فاكس 6764070 للتواصل ارسل رسالة نصية sms إلى الرقم 88548 الاتصالات أو الرقم 636250 موبايلي أو الرقم 737701 زين تبدأ بالرمز 150 مسافة ثم الرسالة
