ازبطوا الأمبير

بالبلدي الفصيح

جمعة مباركة يا حبايب.. بكرة أول أيام الدراسة، وحتبدأ رجعة أكتر من أربعة ملايين طالب وطالبة لكراسي الدراسة، وحنلاقي الشوارع منعنشة من الصباح ومزحومة بالسيارات اللي فيها الطلاب والطالبات، وكلوو رايح على المدارس والجامعات والكليات، والله يعين الأبهات والسواقين على زحمة جدة اللي كل مالها تزيد.. هدا غير انه بعض مشاريع الطرق لسه ما انتهت، وتعال شوف العك في الشوارع.. أتمنى من كل قلبي انه تكون كل المدارس مستعدة لاستقبال الطلاب والطالبات بفصول نظيفة ومكيفات باردة مو مقربعة وحالتها بالبلا، هدا غير نظافة الحمامات (الله يكرمكم) واللي المفروض تكون في شركة نظافة معتمدة ومسؤولة عن ده الشي، لأنه بصراحة اللي بيدخل لبعض المدارس، سواء كانت حكومية أو أهلية، يشوف العجب العجاب من العفن والقرف اللي فيها، واللي أهم من كده صيانة التمديدات الكهربائية عشان لا نسمع ونقرأ بعد كده انه حصلت حريقة في مدرسة ويروحوا طلابنا وطالباتنا فطيس، لانه بعض المدارس المستأجرة من بره الله الله ومن جوه يعلم الله، ونتمنى كمان انه المدارس تكون كاملة العدد من المعلمين والمعلمات، مو بكرة النهار نقرأ في الجرايد انه في نقص في عدد المعلمين والمعلمات، والشي المهم اللي نبغاه كمان انه تكون المقاصف مستعدة بوجبات مفيدة مو مأكولات مقرطسة ما منها فايدة، يعني بالبلدي كده يا ريت يكون في سندوتشات طازة وعصيرات طازة مو المكرتنة اللي ما يجي من وراها إلا المرض...اليوم حترجع الحياة لطبيعتها بعد ما كانت مقلوبة في الإجازة فوقاني تحتاني الليل كان نهار والنهار كان ليل، والله يعينهم على زبط الأمبير من جديد.. والأسبوع اللي بعده حنشوف الكتاكيت الصغار اللي حيروحوا المدرسة لأول مرة، حنشوف البنت متشعبطة في أمها والولد متشعبط في أبوه ودموعهم على خدودهم من الخوف اللي بيحسوا بيه في أول أيام الدراسة، والله يعينهم ويساعدهم على هادا الموال.. وبكرة حيبدأ المدرسين والمدرسات سنة جديدة مع الطلاب والطالبات، وياريت يكونوا خفيفين عليهم في طلباتهم وما يحملوهم فوق طاقتهم بطلباتهم العجيبة والغريبة، لانه في ناس عندهم وناس ما عندهم، والمهم من ده كله انه يسلموهم جداول الحصص على طول عشان لا يتعبوا بناتنا وأولادنا في شيل الكتب كلها، عشان لا يكسرووا ظهوورهم لأنه الرحمة حلووة... وحبايبنا رجال المرور مسؤوليتهم حتكون زايدة حبتين لأنو الشوارع حتكون مزحومة بالسيارات والحكاية يبغالها شوية تنظيم، سواء كان التنظيم في الصباح أو بعد الظهر، والله يكون في عونهم ويساعدهم على الهيلمان اللي حيشوفوه في أول أيام الدراسة.. وحيبدا الزحام في كل المكتبات لانه هادي الأيام موسمهم وشوف واسمع عن الأسعار اللي بتقصم الظهر واللي بتختلف من مكتبة لمكتبة، وما في إلا دبح في خلق الله، وكلوو ببركة وزارة التجارة وحماية المستهلك.. المهم بعد كل اللي قلناه نتمنى من الطلاب والطالبات أنهم يبدأوا سنة حلوة مع معلميهم ومعلماتهم، مو نجي نقرأ والا نسمع بعد كم شهر انو طالب أو طالبة اتضاربوا مع أساتذتهم عشان أمور تافهة ما لها لا طعم ولا معنى، لانو الشاعر بيقول: (قم للمعلم وفه التبجيلا ... كاد المعلم أن يكون رسولا).
أسأل الله سبحانه وتعالى التوفيق والسداد للجميع... وعيشووا كتييييير تشوفوا كتييييير.
للتواصل ارسل رسالة نصية sms إلى الرقم 88548 الاتصالات أو الرقم 636250 موبايلي أو الرقم 737701 زين تبدأ بالرمز 150 مسافة ثم الرسالة