باي باي منح

بالبلدي الفصيح

قبل لا أدخل في هرجتي اليوم عندي كلمتين ورد غطاهم .. من يوم ما بدأت المدارس لنا دحين 3 أسابيع ولسه بعض المعلمين والمعلمات ما سلموا جدول الحصص للطلاب والطالبات يعني بالبلدي كده اتعتلووا يا طلاب ويا طالبات كل الكتب وجيبوها معاكم كل يوم وإلا حنخصم منكم من درجات المواد ... يامعلمين ويامعلمات كسرتووا ظهور أبنائنا وبناتنا من شيل الكتب حرام عليكم كل سنة نحنا والموال ده هدا وانتو بتداوموا قبل ما تبدأ الدراسه بشهر فينكم ما رتبتوا حصصكم إيش فيها لما تسلمووهم الكتب ومعاه جدول الحصص وتريحوهم من هدا التعتيل اللي كسر ظهورهم كل يوم وهما رايحين وراجعين من مدارسهم لكن ما أقول إلا لاحول ولا قوة الا بالله والله يهدي ما خلق... ودحين تعالوا ندخل في هرجتنا حق اليوم ... الحقي يا أمي الحقي يا أمي .. إيش في يا فتوو ؟ شوفي أبويا كان يقرأ في الجريدة وشويه نقز على المركب (المطبخ) وجاب عصاية المكنسة وقعد يرقص مزمار.. يابو فتو يابوفتو إيش اللي حصل فهمني مافي فايدة الراجل مو معايه ماسك العصاية وهات يا مزمار في الصاله وبيردد ويقول والله الشقة جاتني ياناس دلوني عليها ... والله الشقة جاتني ياناس دلوني عليها ... ياراجل إيش فيه دوختني بعصاية المزمار ... امسكي الجريدة واقري الخبر وانتي تعرفي أنا بسووي كده ليه ؟ فين ده الخبر وفي أي صفحة .. اهوو قدام عيونك ومكتوب بالبنط العريض... أيوه لقيتو... صح كلامك بس الله العالم هوه كلام من جد وإلا كلام جرايد زي كل مرة .. نقول إن شاء الله يكونوا عند كلمتهم ويسلموا الأوادم وحدات سكنية ويرحموهم من بهدلة الإيجار وأصحابه لأنه بيني وبينك في ناس لها سنين وسنين وهيه بتستنى منحة الأرض ويبغى لهم كمان سنين وسنين عشان يجي دورهم وياخدوا القرض من صندوق التنمية العقاري والله عالم يكون صاحب المنحة وصاحب القرض عايش وإلا ادحدر على الشرشورة لكن طالما إنهم يبغووا يريحوهم ويريحووا قلوبهم من انتظار المنح وحيعطوهم منح سكنية يكونوا سووو فيهم خير وريحووهم من وجع القلب ووجع البناء ومصاريفه هدا غير المشاريع اللي قالوا عليها ومنها مشروع تطوير المطار القديم ومشروع منطقة خزام وكمان في 24 جسر لسه ما خلصت ولمن تخلص بإذن الله يكون الزحام في البلد انتهى هدا غير انه في 67 مشروع لسه ما بدأوا فيها وكلها عشان يفكفكوا الزحام اللي في الشوارع هدا غير انهم قالوا حيسفلتوا كل الشوارع بعد نهاية المشاريع لانه شوارع جدة لا تسر لا عدو ولا حبيب من كتر ما بهدلت سيارات الأوادم وكمان حيكون في 200 حديقة وكلها حتكون مسطحات خضراء على قد مد البصر بس أهم شي انه هادي المسطحات الخضراء ما تتطبق وترووح للحبايب هدا غير انهم قالوا انهم حيردموا مجرى السيل ويزرعوه وحيكون ممشى طولوا 12 كيلو متر بس أنا كنت أتمنى أنهم يسووا مسطحات خضراء في كل حي من أحياء جدة عشان أهالي الحي ياخدوا راحتهم في المشي زي ما بيصير في بلاد بره على العموم هدا الخبر نشر في يوم 6/11/1430 وحنشوف حيكونوا عند كلمتهم وزي ما بيقول المثل بس بعد التعديل «شمس تطلع شقة تبان» وعيشوا كتيييير تشوفوا كتييييير.
abofatoo@hotmail.com
فاكس: 6764070
للتواصل ارسل رسالة نصية sms إلى الرقم 88548 الاتصالات أو الرقم 636250 موبايلي أو الرقم 737701 زين تبدأ بالرمز 150 مسافة ثم الرسالة