الدكتور أبو فتوو

بالبلدي الفصيح

ايش هدا ياسيدي الظرف اللي شايلوو في يدك ؟ هدا ياستي ظرف جاييني من بلاد (اضرب هنا يترج هناك) وجوة الظرف فيه شهادة الدكتوراه خلاص بعد كده ما تناديني إلا بالدكتور أبو فتو وبعد كده كمان حبلغ الحبايب في الجريدة ما ينشروا أي مقال إلا ولازم يكون قبل اسمي حرف (الدال) وبعدين يا أم فتو ما سألتيني ايش كان عنوان الرسالة اللي أخدت فيها الدكتوراه، ايوه ياسيدي صح ايش كان عنوان الرسالة حقتك اللي أخدت بسببها الدكتوراه ؟ أنا أقولك ياستي، كان عنوان الرسالة (أبو فتو للفرموزا والمنتو) وبكره إن شاء الله لما أروح الشغل أسلمهم الشهادة عشان يسلموني منصب كبير وزيادة كبيرة في الراتب، وأي خطاب يبغالو توقيع ما حيتوقع إلا وحرف الدال قبل اسمي وإلا هادول الدكاترة اللي أخدوا شهادات غير معترف فيها أحسن مني .. أنا ماني عارف هادول الحبايب اللي هما بيقولوا عليهم دكاترة بيسووا في نفسهم كدا ليه يعني بعد التعب ده كلوو والدراسة الجامعية يروح ياخد شهادة دكتوراه مضروبة، طيب يا عمنا اسأل شوف الجامعات المعترف بها في المملكة من الجامعات اللي مو معترف بها والا الحكاية ادفع وخد شهادة ماجستير ودكتوراه، بس أكيد في هادي البلدان اللي أخدوا منها هادي الشهادات في سماسرة يبيعوا هادي الشهادات، بس أنا اللي قاهرني وفاقع قلبي كيف المسؤولين اللي في التربية والتعليم اعتمدوا لهم هادي الشهادات وخلوهم يمسكوا مناصب في إدارتها، واللي أعرفو انه الشهادات ما تنقبل إلا لما تكون مختومة من السفارات اللي أخدوا منها شهادات الدكتوراه .. بعدين بالله عليكم هدا الآدمي اللي شايل هادي الشهادة اللي مو معترف بها وما حقول مزورة أو يمكن تكون مزورة حيكون مرتاح الضمير، كيف جالس على منصب ما يستحقو وكيف بيوقع على معاملات وخطابات وحاطط قبل اسمه حرف الدال و برضو ما يستحقو، وكيف ياكل ويشرب ويلبس وهوه عارف انه هادي الرواتب ما يستحقها وهوه متأكد انه هادي الشهادة اللي معاه غير معترف بها يارب رحمتك ورضاك، إلى هادي الدرجة في أوادم ما تفرق معاهم حلال والا حرام .. بس بيني وبينكم المفروض من كل أجهزة الدولة والقطاع الخاص انهم يكونوا حريصين من هادول الدكاترة اللي شايلين شهادات دكتوراه مو معترف بها والمفروض كمان انه يكون في تعليمات صارمة عليهم عشان لا يتصرفوا براحتهم وياخدوا مناصب ورواتب هما ما يستحقوها، وفي غيرهم كتيير معاهم شهادة دكتوراه معترف بها ومهمشين وهما المفروض اللي يستحقوا هادي الرواتب وهادي المناصب لأنهم أخدوا شهادات الدكتوراه بتعليمهم وتعبهم وسهرهم وغربتهم ويستحقوا حرف الدال بحق وحقيق، وغيرهم أخد حرف الدال سبهللة في سبهللة وشكلهم ما يعرفوا انه الدال اللي أخدوها معناها بالهندي ( عدس ).. وعيشوا كتيييييير تشوفوا كتيييييير.