شرنقة الصحة فاسدة

بالبلدي الفصيح

دحين انت لك كم يوم وانت مسخن وتعبان، ليش ما تروح المستشفى عشان يعطوك شرنقة (ابرة) وترتاح من حكاية السخونة دي اللي كل شوية وانت داخل على (بيت الماء) عشان تتروش .. نعم يختي تبغيني اروح المستشفى؟ تبغيني اروح للموت برجولي، ليه قالوا لك مخي ضارب والا ايه، لا ياستي لا حروح ولا ح اجي، بعدين الترويش أفضل مليون مرة من الشرنقة حق وزارة الصحة، وبعدين زي ما بيقولوا (العمر مش بعزئة)، أسلم نفسي لشرنقة منتهية الصلاحية عشان تجيب خبري، يعني ما يكفي المصايب والأخطاء الطبية اللي جالسة بتصير في المستشفيات، سواء كانت حكومية أو خاصة وتبغيني فوقها آخد شرنقة .. البني آدم يدخل على مستشفى من هادي المستشفيات اللي اسمها من بره الله الله ومن جوه يعلم الله سليم وما فيه إلا شوية تعب أو ألم، يخرج من عندهم مكفن والا ناسين في بطنه مقص والا زرادية، وعلى ايه ده كلوو خلييني على ليمون بن زهير وأبوفاس وربك سامع الدعاء، لأنه بيني وبينك الخبرين اللي كانوا منشورين الأسبوع اللي فات خبرين يوجعوا القلب ويفوروا الدم .. معقولة يكون كده حال وزارة الصحة ومعقولة يكون في أوادم ماتت ضمايرها ومايهمها إلا الفلوس، يالطيف يارب ارحمنا برحمتك .. فينهم هما هادول الخبرين ياسيدي؟ استني شوية أروح أجيب الجريدتين من كومة الجرايد اللي في الغرفة، شوفي ياستي أهو هدا هوه الخبر الأول وهدا كمان الخبر التاني، شوفيهم قدام عيونك اقري بصوت عالي وخلي كل الحبايب اللي في البلد يسمعوا .. طيب ياسيدي الخبر الأول كان يوم الأحد 19/4/1431، وبيقول (حقن 11 طفلا بتطعيمات منتهية الصلاحية)، وربنا يستر لا يكونوا هادول الأطفال بعد الحقنة دي صاروا يمشوا ريوس والا ينتعوا ابوه، والخبر التاني إيش بيقول ياستي، والخبر التاني ياسيدي كان في يوم السبت 25/4/1431، وبيقول (كشف 43 ألف عبوة دواء منتهية الصلاحية في محافظة واحدة)، شفتي المصايب والبلاوي اللي جالسة بتصير في وزارة الصحة إلى هادي الدرجة وصل الإهمال والاتكالية في قطاع مهم زي وزارة الصحه، بالله عليكم كيف حيطمنوا الأوادم على أرواحهم إذا كان كده هوه حالها، إهمال، تسيب، اتكالية، مافي رقابة، فساد مالي وإداري، إلى هادي الدرجة صارت أرواح الأوادم رخيصة، بعدين ما يبغالها لا فهلوة ولا شطارة، خلاص الأدوية والحقن المنتهية اتلفوها والا حتى أحرقوها، لكن اللي باين من الحكاية إنه مراقبة المخزون في وزارة الصحة (ماعندك أحد)، بعدين إذا كانت هادي المصايب والبلاوي صارت في محافظة القنفذة بس، فما بالك عن المناطق التانية وربنا يستر عشان كدة بقول ياحبايبنا يا مسؤولين يللي في وزارة الصحة خافوا الله في الناس وخلوا بالكم من وزارتكم، كيف تبغوا الناس تطمن على حياتها وحال وزارة الصحة لا يسر لا عدو ولا حبيب، بعدين حكومتنا الرشيدة الله يحفظها ما قصرت معاكم، بتعطيكم ميزانيات بالمليارات عشان تهتموا بحياة المواطن الصحية، مو تتركوا أدوية وحقن منتهية عشان تجيب خبر الأوادم، عشان كده بتمنى إنه يكون في رقابة دورية على كل الأدوية والحقن عشان لا يروحوا أهل البلد فطيس بسبب إهمال مجموعة من الموظفين اللي ماتت ضمايرها، وفوق كل ده ما عندها خوف من رب العباد وعيشوا كتيييييير تشوفوا كتييييييير
abofatoo@hotmail.com
فاكس: 6764070
للتواصل ارسل رسالة نصية sms إلى الرقم 88548 الاتصالات أو الرقم 636250 موبايلي أو الرقم 737701 زين تبدأ بالرمز 150 مسافة ثم الرسالة