940 فقط لا غير

بالبلدي الفصيح

أبويا أبويا.. هلا يا فتو ايش عندك.. لك فترة طويلة ما اعطيتني لغز من ألغازك الحلوة ؟ أساسا لو أعطيتك اللغز ما حتعرفي تحليه لا انتي ولا حتى الحبايب من القراء مو مشكلة أنا حقول اللغز ونشوف مين منهم حيحلووا هيا ركزي وخليكي معايا انتي والقراء (واحد وإخوانه كتييير.. ينضرب فيهم أمثال كتييير.. وأولاد عمهم ساكنين جنبهم لا وصال ولا ود بينهم وفي النادر يزوروا بعضهم) انتهى اللغز ونشوف مين اللي حيحلوا.. وشوية تجي أم فتو وتقول انت لك كم يوم وانت منت مزبوط زعلان ومتعكنن حتى وانت بتقول اللغز.. صح كلامك ياستي شي يوجع القلب ويفور الدم.. ياسيدي فهمني ايش اللي حصل؟ ياستي قبل كم يوم جات عيني على خبر بيقول انه موظفي المطافي والإنقاذ إللي بيشتغلوا في شركة متعاقدة مع هيئة الطيران رواتبهم 940 ريال ياسلااااام ريال ينطح ريال وبيداوموا 8 ساعات في اليوم يعني دوام رسمي ولهم اكتر من 8 سنوات وهما شغالين على ده الموال حتى من غير حوافز ولا تأمبن صحي ولا زيادات كمان هدا غير انه وظيفتهم هادي تعرضهم للخطر والموت لأنهم مكلفين بالإطفاء والإنقاذ لما تصير حوادث في المطارات هيا بالله ده مو خبر يوجع القلب ويفور الدم ايش تسوي 940 ريال في الزمن ده اللي كل يوم والتاني الأسعار بتجنن وترتفع فيه وكلو من تحت راس حبايبنا التجار والمستهلك الغلبان هوه اللي يروح فطيس.. كيف حيعيشوا هادول الموظفين اذا كان عندهم أولاد وزوجات وإيجار بيت ومصاريف كيف حيعيشوا حياة كريمة إذا كانت هادي هيه رواتبهم.. لكن نصيحة مني لهم أنا ح اعطيهم الحل وأكيد ال 940 ريال اللي حيستلموها حتكفيهم وتزيد بس هما يسووا زي ما حقولهم ويسيبوهم من البعزقة حقتهم وهاتوا قلم وورقة واحسبوها معايا.. ميتين ريال لإيجار البيت واذا لقي سعر أقل من كده يكون أحسن.. عشرة ريال لفاتورة الكهرباء وبلاشي من استخدام التلاجة قوالب التلج رخيصة.. خمسة ريال لشحن الجوال ويخليه استقبال بس والاتصال للضرورة.. خمسة ريال كمان للبنزين وياريت يكون عنده دراجة 26 للمشاوير الضرورية.. ستين ريال لمصاريف الأعياد بس أهم شي لا يروح الملاهي برحة العيدروس موجودة ويا كتر المراجيح اللي فيها.. و30 ريال لمصاريف المدارس وبلاشي من الشنط خلي أولادهم يلفووا الكتب في لستك.. تمانين ريال مصاريف للبيت والا الأحسن من كده يرسلووا أولادهم للجيران عشان شوية ملح وحُق صلصة.. أربعين ريال لقسط السيارة.. خمسين ريال لوايت الموية وبكده تطلع الحسبة كلها أربعمائة وتمانين ريال والباقي أربعمية وستين ريال حطوها شهريا في حصاله لمدة عشرين سنة واشتروا فيها غرفة تمليك عشان ترتاحوا من وجع الإيجارات لانه قطع الأراضي صارت تخوف لأنها قريبة من الأودية أو أنها بعيدة ما توصلها الخدمات.. من جد شي يحزن وشي يوجع القلب ويفور الدم هادي المصيبة اللي عايشينها هادول الموظفين عشان كده بقول يا حقوق الإنسان يا وزارة العمل شوفوا حل لهادول الموظفين الغلابا اللي بيعرضوا حياتهم كل يوم للخطر وثبتوهم في وظايفهم واعطوهم مميزات الرواتب زي بقية خلق الله عشان يعيشووا معززين مكرمين، وعيشوا كتييييير تشوفوا كتييييير.
abofatoo@hotmail.com
فاكس: 6764070
للتواصل ارسل رسالة نصية sms إلى الرقم 88548 الاتصالات أو الرقم 636250 موبايلي أو الرقم 737701 زين تبدأ بالرمز 150 مسافة ثم الرسالة