نواف بن فيصل الله يعينك

بالبلدي الفصيح

سامحني ياطويل العمر وخليني أتكلم بلسان المواطن الشعبي البسيط وأقول كل اللي في قلبي لأنه اللي جالس بيحصل من هادول اللعيبة يفور الدم ويوجع القلب. في المباراة الأولى مع عمان خرجنا بالتعادل بالبركة وقلنا بعدها حيتعدلوا اللعيبة، ومباراة راحت وعدت وإن شاء الله تتعوض مع استراليا، ولعبنا مع استراليا وكانت المباراة في الدمام يعني في بلدنا وبين جمهورنا وقلنا خلاص العيال ما حيقصروا وحيبيضوا الوجه لكن للأسف قدموا مباراة سيئة وخرجوا مغلوبين تلاته صفر مع الرأفة، ومابين مباراة استراليا وتايلند كانت في فترة شهر تقريبا، وقبل المباراة بأسبوعين سوى المنتخب معسكر في ماليزيا، وقلنا خلاص إن شاء الله العيال فهموا الدرس وماحيقصروا وحيفرحوا جماهيرهم ويفوزوا على تايلند ويبيضوا الوجه لكن للأسف كان تعادل بطعم الهزيمة، المنتخب لعب صح وفرص ضاعت صح لكن للأسف لعيبة ضايعين ومرتبكين مو عارفين كيف يتصرفوا قدام الباب وهما للأسف محترفين. فين ياسر، فين نور، فين الفريدي، فين تيسير، فين ناصر، فين الزوري، فين معاذ، فين المولد، فين الهوساوي، ايشبهم كدا ضايعين هادول هما اللي جالسين يسموا نفسهم محترفين وهما ما يعرفوا ايش معنى الاحتراف، للأسف الاحتراف عندهم بس متى ينتهي عقدي عشان أطلب الملايين وهو عارف انه في ناس حتدفع الملايين، لكن صدقوني انتو ما تستاهلوا إلا الملاليم وخلوا الملايين للعيبة اللي يقدروا بلدهم ويعرفوا قيمة المسؤولية. لكن الواحد ايش يقول إلا ياخسارة الملايين اللي بتندفع لكم، ليه كدا يا لعيبتنا، ليه كدا تتعبونا وتقهرونا، ايش اللي ناقصكم؟. الحمد لله الاتحاد السعودي لكرة القدم وعلى راسهم نواف بن فيصل مو مقصر معاكم جاب لكم مدرب عالمي مشهور ومعروف اتعاقد معاه بملايين الريالات وانتو ايش ناقصكم كل شي متوفر لكم عقود احترافية بملايين الريالات وبتركبوا أغلى الموديلات من السيارات، كدا يكون مستواكم في المباريات؟. هادي هيه وطنيتكم؟. هدا هو حبكم لبلدكم وشعبكم؟. كدا بتردوا الجميل للرجل اللي ماقصر معاكم في كل صغيرة وكبيرة، ايش اللي تبغوه عشان يعطيكم هو، وهو حيعطيكم وانا عارف ومتأكد إنه ما حيقصر معاكم، بس فالحين تتشطروا على بعض في مباريات الدوري، بس فالحين كل ما انتهى عقد واحد منكم تطالبوا بعقود جديدة بملايين الريالات وانتو في منكم لعيبة مايسووا حتى مليون ريال لمده 20 سنة، يالعيبة عيب عليكم استحوا على نفسكم قدموا شي لبلدكم وشعبكم فرحوا جماهيركم اللي تنتظر منكم هدف عشان تفرح بفوزكم وتأهلكم، لكن للأسف الملايين اللي بتاخدوها وانتو أساسا ما تستحقوها قتلت وطنيتكم وحبكم لوطنكم، ماصارت تفرق معاكم فاز المنتخب أو مافاز ما يهم..
آآآآه فينك يا ماجد عبدالله، فينك يا يوسف الثنيان، فينك يا فهد المصيبيح، فينك يا فهد الهريفي، فينك يا محمد عبدالجواد، فينك ياصالح النعيمة. هادول هما الرجال اللعيبة اللي كانوا يعرفوا قيمة شعار وطنهم لما كانوا يلعبوا، هادول اللي كانوا يلعبوا كورة وماكانت تهمهم الفلوس ولا الملايين لأنهم كانوا يلعبوا عشان سمعة بلدهم، هادول اللي كانوا يلعبوا كورة بدم قلوبهم، هادول اللي كانوا يحرثوا الملعب ويحرقوا نفسهم عشان يفرحوا شعبهم بالانتصارات اللي قدموها لبلدهم. لكن ما نقول إلا الله يسامحكم يا لعيبة المنتخب كرهتونا في الكورة .. وعيشوا كتييييير تشوفوا كتيييييير..
abofatoo@hotmail.com