بند الألم والقهر

بالبلدي الفصيح

الجمعة اللي فاتت كان في خبر نشروا زميلنا عبدالرحمن الختارش وفي بداية الخبر كان مكتوب العبارة اللي حتقروها معايا واللي حاطها بين قوسين واللي بتقول (صدر الأمر السامي في 25/6/1426ه، القاضي بتثبيت جميع موظفي البنود، وتعميم وزير الخدمة المدنية في 24/10/1426ه، المبني على الأمر السامي نفسه، ورغم صدور القرارات والتعاميم لحل إشكالية بند الأجور، إلا أن موظفات وموظفي بند الأجور يتطلعون للتثبيت الوظيفي، حتى يتسنى لهم ممارسة حقوقهم في بناء حياة أسرية واجتماعية مستقرة. والله مصيبة كبيرة هيه شوفوا تاريخ الأمر السامي من متى وشبابنا وبناتنا لسه بيعانوا من كل أنواع الظلم والقهر من بعض القطاعات الحكومية والشركات الخاصة وآخر هادي الأخبار اللي ما تسر لا عدو ولا حبيب هيه الفصل التعسفي لشباب وبنات البلد هو فصل وطرد 163موظف من مستشفى الملك عبدالعزيز وكله من تحت راس هادي الشركات التشغيلية اللي ماسكه هدا المستشفى شركات بتستلم الملايين وبتتصدق على شباب وبنات البلد بالفتات رواتب الواحد يستحي يتكلم عنها لا والمصيبة مو هنا المصيبة انه هادي الشركة التشغيلية اللي ماسكه المستشفى فصلت الموظفين السعوديين وتركت الحبايب اللي من كل جنس ولون يسرحوا ويمرحوا فيها يا عيني على كده فين مكتب العمل عن هدا التجاوز اللي بتسويه هادي الشركة يا سبحان الله دايما خيرنا لغيرنا ياناس ياهوه الين متى وهادي الشركات التشغيلية جالسة بتاكل من خيرات هدا البلد؟ الين متى والاتفاقيات والعقود تتم من تحت الطاولة عشان هادي الشركات تلهف الملايين وبعد كده ترمي شبابنا وبناتنا في الشوارع الين متى والمسؤولين في هادي الشركات شغالين إهانة في شبابنا وبناتنا ؟ ليش ما تثبت وزارة الصحة هادول الموظفين على وظايف رسمية عشان يحسوا بالامان الوظيفي الين متى ونحنا نقرا كل يوم عن الظلم والقهر اللي بيعشوه هادول الموظفين الغلابا.. ما في قطاع حكومي إلا وتسمع فيه عن بند الأجور وبند 105 وبند التشغيل الذاتي والله يعلم ايش باقي كمان من بنود ما نعرف عنها.. ياوزارة المالية يا ديوان الخدمة المدنية يا مكتب العمل ارحموا من في الأرض يرحمكم من في السماء هادول أولاد البلد فين يروحوا وكيف يعيشوا وهما عايشين تحت رحمة شركات ما تخاف الله فيهم رواتب ما تكفيهم لمصروف جيبهم كيف حيعيشوا وكيف حيصرفوا على حياتهم وانتوا شايفين الغلا الفاحش اللي منتشر في البلد ايش حتسوي 1500 ريال في هدا الزمن موظفين فاتحين بيوت ومتزوجين ولا عندهم تأمينات ولا إجازات كيف حتكون حياتهم وهما عايشين على هادي الرواتب رسموهم في وظايف رسمية عشان يحسوا بالأمان الوظيفي ويعيشوا حياة كريمة زي بقية إخوانهم وأخواتهم اللي مترسمين في وظايفهم الحكومية ترى شبابنا وبناتنا فيهم الخير والبركه بس انتو بحبحوا يدكم واكرموهم وانتوا تشوفوا اللي يرضيكم ويسركم وعيشوا كتييييير تشوفوا كتيييييير.
هرجة / يا وزير الصحة الله يعطيك الصحة والعافية ويعينك على الأمانة اللي اتحملتها أنت مشهور عالميا بفصل التوائم شوف حل عاجل وسريع في حكاية فصل هادول الموظفين الغلابا ولك مني كل التحية والتقدير.
للتواصل ارسل رسالة نصية sms إلى الرقم 88548 الاتصالات أو الرقم 636250 موبايلي أو الرقم 737701 زين تبدأ بالرمز 150 مسافة ثم الرسالة