المنكوبين والمنكوبات

بالبلدي الفصيح

دحين انا ابغى افهم ياسيدي كل يوم والتاني بشوف في الجريدة إعلانات يا كترها عن هادي اللي بيقولوا عليها معاهد وأكاديميات وكليات صحية وإنها بتقدم دورات ودبلومات في كل المجالات الصحية، أيش حكايتهم هادول يعني من كتر الوظايف اللي بيوفروها للمتخرجين والمتخرجات، والا من كتر ما بيرسلوا الخريجين والخريجات على المستشفيات اللي مرصوصه في البلد؟. والله ياستي الحق مو على الجرايد، الحق على وزارة الصحه اللي ساكته وشايفه وعارفه إنه مافي وظايف صحيه في المستشفيات.. طلاب وطالبات ياكترهم متخرجين من هادي الكليات الصحيه ومو لاقييين وظايف، وبعدين هيه جات على الوظائف الصحية، آلاف الخريجين والخريجات ومن أغلب التخصصات مو ملاقيين وظايف، ولهم عشرات السنين وهما عاطلين، اللي متخرجين من اللغة العربية، والا من علم الاجتماع، والا من التاريخ والجغرافيا، والا من الشريعة وأصول الدين، حتى سواقة الليموزين وسوق الخضار محرومين من الشغل فيه، طالما جماعة طق الرقبة مسيطرين عليها.. بس اللي قاهرني ورافع ضغطي وزود عليا عيار السكر حبتين اللي متخرجين ومتخرجات من اللغة الإنجليزية، والله شي يقهر ويحزن لما نشوف طلابنا وطالباتنا وهما ما يعرفوا اتجاه الرقم 9 فين، أنا أبغى أفهم أيش اللي يمنع من تدريس اللغة الإنجليزيه من سنة أولى ابتدائي، أيش اللي يمنع فهموني؟، ونحنا والحمد لله عندنا خريجين وخريجات من قسم اللغه الإنجليزيه ياكترهم وعلى قفا من يشيل، افتحوا فصول في المرحلة الابتدائيه ومن الصف الأول الابتدائي وعينوهم بدل ما هما عاطلين لا شغله ولا مهره، والا لازم ندفع فلوس للمدارس الأهلية عشان نعلم أولادنا وبناتنا هادي اللغه العالميه.. والا عاجبكم التأليف اللي بيألفوه لما تشوفوا وتصححوا أوراق الاختبارات حقتهم.. ياناس ياهوه البيوت مليانه عاطلين وعاطلات لا وظايف ولا زواج، ألين متى حيكون عندنا متخرجين ومتخرجات من كل التخصصات ومايكون عندنا وظايف؟، ياناس حرام عليكم قهر الرجال والبنات بالبطالة، ألين متى حيقعدوا محنطين ومنتظرين وهما كل يوم والتاني يسمعوا ويقروا عن هادي التصريحات والوعود اللي ما جا من وراها إلا الهم والغم والمرض والفقر لهم ولأهاليهم؟، ياناس ياهووه دبروها وافتحوا مجالات كتييره عشان نقدر نستوعب كل هادول المتخرجين. ياناس ياهووه ارتفعت معدلات الجريمة والعنف الأسري والأمراض النفسية، وصارت كلمة (انتحار) مربوطه بمرض نفسي، ياناس يامسؤولين دبروها لجل الله وشوفوا حل لهادول المنكوبين والمنكوبات، وارحموا من في الأرض يرحمكم من في السماء، وعيشوا كتييييير تشوفوا كتييييير.
abofatoo@hotmail.com فاكس: 6764070
للتواصل ارسل رسالة نصية sms إلى الرقم 88548 الاتصالات أو الرقم 636250 موبايلي أو الرقم 737701 زين تبدأ بالرمز 150 مسافة ثم الرسالة