لا بكالوريوس ولا ماجستير ولا دكتوراه

بالبلدي الفصيح

انت لسة غاوي كتابة ياسيدي ما تبغى تتوب وترتاح من الهم والغم ووجع القلب، أنا عارفة انت ما حتبطل كتابة إلا لما واحد من المسؤولين أو الوزراء يقدم فيك دعوة ويشتكيك في ديوان المظالم وبعد كده يدخلوك (دار أبو سفيان) وشوف بعد كدا بكم حيصير سعر كيلو الحلاوة الطحينية من كتر ما حجبلك هيه وانت مسنتر في دار أبو سفيان، لا حول ولا قوة إلا بالله يابنت الحلال استهدي بالله وصلي على النبي وفال الله ولا فالك وبعدين اطمني أنا لما بكتب ما بكتب في شخص المسؤول أو الوزير أنا بكتب عن الشي اللي بتشوفه عيني والمفروض المسؤول أو الوزير يشكرني مو يزعل مني لأني أنا حكون العين اللي يشوف فيها المسؤول أو الوزير وبعدين اطمني ما حدخل دار أبو سفيان زي ما قلتي لانه حبيبنا وزميلنا وجاري في عكاظ الأسبوعية المحامي (أحمد عجب الزهراني) اتكفل انه يترافع عننا نحنا الكتاب في المحاكم، ياسلام وحيترافع عنك كده بلووشي ؟ لا ما يهمك أحمد الزهراني دواه عندي.. يعني مصمم انك تكتب ؟ أيوه ياستي مصمم إني أكتب واللي مكتوب على الجبين لازم تشوفه العين، طيب وايش حيكون مقالك ياسيدي؟ آآآه آآآه سيبيني في حالي الله يرضى عليكي ؟ ياسيدي فهمني ايش في؟ اسمعي ايش راح أقول وبعدين احكمي يحق لي أزعل والا لا ؟ طب استنى قبل ما تتكلم خليني أجيب براد الشاهي المغربي عشان تفضفض براحتك وتقول كل اللي في قلبك.. اسمعي ياستي دحين كم باقي على نهاية السنة الدراسية ؟ باقي ياسيدي حوالى خمسة أشهر.. يعني حيكون في عندنا متخرجين ومتخرجات من المدارس الثانوية وفي متخرجين ومتخرجات من الجامعات والكليات والمعاهد صح كده ياستي، صح ياسيدي، طيب هادول اللي حيتخرجوا السنة دي من الجامعات ايش حيكون مصيرهم ؟ علمي علمك ياسيدي، حيكون مصيرهم زي مصير اللي اتخرجوا من سنوات طويلة ولسه ما حصلوا وظايف لانه ياستي مافي مخرجات للتعليم، ومافي تخطيط لقدام، آلاف المتخرجين والمتخرجات بيتخرجوا من الجامعات والمعاهد الصحية والكليات ومصيرهم الأرصفة والا يقدموا في حافز أو جدارة هدا إذا انطبقت عليهم الشروط، وإذا ما انطبقت عليهم الشروط حيغنوا ياليل ما أطولك هدا غير المبتعثين والمبتعثات اللي راحو درسوا في بلاد بره واتخرجوا من هناك بتخصصات نادرة وبرضوا مو محصلين وظايف وكل خريج وتخصصه والمصيبة انه بعض الجامعات بتفضل غير السعودي على ولد البلد رغم انه ولد البلد متعلم وعنده ماجستير ودكتوراه وبتخصصات نادرة ومطلوبة ويحتاجها البلد لكن مافي فايدة واللي عاجبه عاجبه واللي مو عاجبه ينتف حواجبه ... وعيشوا كتيييير تشوفوا كتيييير.
abofatoo@hotmail.com
للتواصل أرسل رسالة نصية sms إلى 88548 الاتصالات أو 636250 موبايلي أو 737701 زين تبدأ بالرمز 150 مسافة ثم الرسالة.