null

* دحين أنا أبغى أفهم انت زعلان ومتضايق ليه؟ من ساعة ما تركت قراية الجريدة وانت متعكنن وحالك مو عاجبني أقدر أعرف ليش ؟ تبغي تعرفي ليش ياستي أنا متعكنن ومتضايق ؟ أيوه ياسيدي أبغى أعرف ؟ شوفي الجريدة قدامك وحتلاقي الخبر قدام عيونك في الصفحة الرئيسية هااه شفتي الخبر؟، أيوه ياسيدي شفتو .. هيا سمعيني الطرب قصدي الخبر ايش بيقول عشان يسمعوا الحبايب حقون ديوان الخدمة المدنية .. بيقول الخبر يا سيدي ( لسنا مطالبين بتوظيف كافة خريجي الجامعات) وبيقول كمان ( لدينا حاليا سيل من الخريجين والخريجات من حملة التخصصات التي لا تحتاجها أجهزة الدولة وبإمكان قطاع الأعمال استيعابهم وتأهليهم).
هيا بالله عليكي هدا الخبر ما يرفع الضغط ويوجع القلب ويفقع المرارة لكن ايش تقولي هو دا ديوان الخدمة المدنية.. المتخرجين والمتخرجات بيقدموا عليه من سنين ومافي فايدة، وفي الأخير جابوا الغايبة وقالوا مو مسؤوليتنا انه نوظف كل اللي بيتخرجوا من الجامعات وزادوني شوق كمان لما قالوا إنه توجد تخصصات ما تحتاجها الدولة عشان كدا ما لهم توظيف عندنا وخلوهم يشوفوا لهم حل في القطاع الخاص. يا عيني هو دا ديوان الخدمة المدنية وهادي هي الاسطوانة حقتو اللي بنسمعها كل سنة ما تغيرت.. يعني لا هما وظفوا اللي محتاجين الوظايف ولا وظفوا اللي عندهم تخصصات ما تحتاجها الدولة ؟ طيب وليه من الأساس تخلوهم يدرسوا ويتعبوا ويتخرجوا من الجامعات والمعاهد والكليات إذا كان مصيرهم حيكون ( ملف علاقي وبس) ياناس يامسؤولين المتخرجين والمتخرجات يا كترهم في البلد وظفوهم وارحموا حالهم ويارب فرج هم كل مكرووب قولوا آمين.
مخطط الحرمين العقاري في جدة يجتذب المستثمرين السعوديين ويحقق مبيعات بقيمة 320 مليون دولار هيا احسبوها وشوفوا كم تطلع بالريال وشوفوا الإعلانات اللي انضحك فيها على الغلابى .. شقق فاخرة للتمليك نظام فلل .. شقق فاخرة للتمليك نظام فلل دبلكس مكونة من 7غرف + غرفة شغالة + 5حمامات + صالتين + مطبخ نظام أمريكي، ياعيني على الدلع ... شقة تمليك، الشقة عبارة عن 10 غرف +6 حمامات مدخل في الدور الأول ومدخل الدور التاني وغرفة شغالة + خزان مستقل + غرفة سائق + موقف خاص لكل شقه + مطبخ في كل دور... آآآه آآآه يا خسارة تحويشة العمر اللي دفعوها بعض الغلابى في شقق سكنية مضرووبة وربنا يعوض الغلابى اللي ورطوا في قروض مع البنوك عشان يشتروا شقق تمليك ويستروا نفسهم ويرحموا حالهم من الإيجارات وقرفها، لكن ياخسارة طلعت شقق للتوريط مو للتمليك.. يالطيف الطف إلى هادي الدرجة في عالم ذمتها واسعة وما تخاف الله وما يهمها تأكل في بطنها حلال والا حرام ما تفرق معاهم .. يا أمانة عيب كدا والله عيب معقولة مخطط جديد يكون كدا حاله شي يحزن دا اللي جالس بيصير في مخطط الحرمين مخطط من عام 1424 يعني ماله الا تمنية سنوات يكون كدا حاله .. معقولة أمانة جدة تعتمد مخطط من غير ما يكون فيه بنية تحتية .. من يوم ما جات المطرة والحي معدوم لا تصريف مياه أمطار ولا تصريف صرف صحي ومنسوب المياه الجوفية ارتفع فيه بشكل مخيف واللي زاد الطين بلة انه مياه الصرف الصحي دخلت على خزانات الموية الحلوة وبعض العماير هبطت لانه الأرض سبخة هدا غير الحشرات والبعوض والناموس اللي جابت لسكان الحي القرف والمرض هدا غير الشوارع اللي اتبهدلت وصارت الحفر والمطبات والتشققات أشكال وأنواع في الحي.. عشان كدا بقول يا أمانة جدة دخيلك شوفي حل للمصايب اللي جالسة بتصير في مخطط الحرمين، ترى الحال ما يسر لا عدو ولا حبيب وارحموا من في الأرض يرحمكم من في السماء.. وتووتة تووتة خلصت الحدووتة .. وعيشوا كتييير تشوفوا كتييير.
مثل حجازي: رضينا بالهم والهم ما رضي بينا.
مراد جميل .. فينك ياعمنا تراك وحشتنا.
abofatoo@hotmail.com
للتواصل ارسل رسالة نصية sms إلى الرقم 88548 الاتصالات أو الرقم 636250 موبايلي أو الرقم 737701 زين تبدأ بالرمز 150 مسافة ثم الرسالة