جاك الموت يا تارك الصلاة

بالبلدي الفصيح

قبل ما أبدأ في المقال يا حبايب اعطوني رأيكم في الصورة؟ هاااه ياستي عشانا جاهز؟ إيوه ياسيدي دقايق ويكون على السفرة، طيب لا تنسيني من طبق المخلل المديني ما يزحلق الأكل إلا المخلل والشطيطة، حاضر ياسيدي، يللا ياسيدي العشاء جاهز، تسلم يدك هيا قولي بسم الله، وي ياسيدي اللي ياكل لوحده يزور، ياستي مافي إلا أنا وانتي على السفرة، لا مو لوحدك لازم تعزم القراء اللي يحبوك على السفرة، صح معاكي حق هيا اتفضلوا ياحبايب على المقسوم شوية سليق مع السمن البري اللي يحبوا قلبكم، إيش أبغى أقولك، فاكرة الخبر اللي كان منشور في الجريدة في نهاية رمضان واللي بيقول غياب 70 ألف موظف في آخر أيام رمضان، «ضبطت هيئة الرقابة والتحقيق أمس الأول 70130 حالة غياب بين الموظفين الحكوميين، ما دعا الهيئة للمطالبة بتطبيق نظام جديد يحد من تفشي ظاهرة الغياب في الأيام الأخيرة التي تسبق الإجازات الرسمية». إيوه فاكره بس 70 ألف كتيير والله ياسيدي، إيش تبغي تقولي بس بعض الموظفين الله يهديهم ويصلحهم ماني عارف كيف تهون عليه نفسه إنه ياكل مال حرام يعني إيش فيها لما يداوم في مكتبه زي باقي خلق الله ويشوف معاملات المراجعين بدل ما تتكدس في مكتبه وتتعطل مصالح الناس يعني يقبل على نفسه ياكل حرام ويؤكل أهل بيته بالحرام، بعدين المفروض الموظف يراقب نفسه لأنه الله سبحانه وتعالى عالم ومطلع على عمله يعني لازم يكون في خوف الله في قلبه ويؤكل نفسه واهل بيته بالحلال وكل الحكاية من 7.30 الى 2.30 يعني دوام احلا منه مافي ويكفي إنه عندهم خميس وجمعه إجازة، هدا غير إنه عندهم إجازة في العيد وإجازة في الحج، طيب ياسيدي وحيكون كده حالهم ما حيتعدلوا ويخافوا الله في اكل عيشهم وياكلوا لقمتهم بالحلال، إلا ياستي حينزبط حالهم بعد الخبر اللي كان منشور قبل كم يوم واللي بيقول «تطبيق نظام البصمة لضبط موظفي الدولة.. كشفت ل «عكاظ» مصادر مطلعة، عن تطبيق نظام البصمة بدلا من دفتر الحضور والانصراف في جميع القطاعات الحكومية العام المقبل. ويأتي تطبيق البصمة بعد أن ثبت لجهات الاختصاص فشل دفتر الحضور والانصراف وعدم ملاءمته لتطور العصر، إضافة لتسيب عدد من الموظفين من الدوام الرسمي في الإدارات الحكومية». طب حلو كده يعني ما حيكون في دفتر حضور وانصراف بعد كده؟ لا ياستي خلاص ما حيكون في الدفتر المعتق ده اللي له اكتر من 50 سنة ودوائرنا الحكومية شغالة عليه وأساسا الدفتر ده لو يعرف طريق المحكمة كان راح اشتكى 80 في المائة من موظفي الدولة من الفساد الظلم والاضطهاد اللي جاء عليه من بعض موظفي الحكومة من كتر ما كل واحد يكلم زميله ويقولوا «دخيلك وقعلي» حلو نظام البصمة ياسيدي خليهم يستاهلوا عشان يعرفوا ان الله حق ويخافوا الله ويتقوا الله في أكل عيشهم وبلاشي من شغل البزوطه حقهم، بس ياستي الخوف مو هنا الخوف إنه نظام البصمة يطبق على الموظفين الغلابى بس والمدرا والمسؤولين الكبار لا هنا يكون الخوف عشان كده لازم يطبق النظام على الكل وأولهم أي مسؤول كبير في أي دائرة حكومية لأنه هوه القدوة بالنسبة للموظفين لأنه لو بزوط في دوامه الموظفين برضوا حيبزوطووا زيوو ويقولك طز في الدوام وفي المراجعين عشان كده نظام البصمة نظام ممتاز عشان كل موظف ياخد راتبه بالحلال وعلى حسب الساعات اللي اشتغلها في اليوم، بس السؤال اللي يسدح نفسه: فينها هيئة الرقابة والتحقيق وفينهم مسؤولي الدوائر الحكومية ساكتين عن هادي البزوطه اللي جالسه بتصيرفي إداراتهم كل هادي السنوات الطويلة ؟؟!! وعيشوا كتييييير تشوفوا كتييييير.
هرجه: يا بعض موظفي الدوائر الحكومية خافوا الله واتقوا الله في أكل عيشكم وعيش أهلكم وأولادكم.
مثل حجازي: ما يعجبهم العجب ولا الصيام في رجب
abofatoo@hotmail.com
للتواصل أرسل رسالة نصية sms إلى 88548 الاتصالات أو 636250 موبايلي أو 737701 زين تبدأ بالرمز 150 مسافة ثم الرسالة