إيشبك كده فرحان ومصهلل ياسيدي؟ فاكره مقال الأسبوع اللي فات اللي كان عنوانه (يرضيك كده ياوزير العمل) أيوة إشبو ياسيدي؟ جاء عليه ردود كتيرة من القراء وهدا بيدل على أنه ياما في القطاع الخاص من مظاليم لأنه أول شي عندهم زياده في أوقات العمل.. ليش ما يكون في مساواة في ساعات العمل يعني الدوام يبدأ 7.30 وينتهي 2.30 عشان نحبب هادول الشباب والشابات في القطاع الخاص لكن بالله لما يكون الدوام من 8 إلى 5 فين حيروح بعد كده الموظف أو الموظفة حيوصل بيته على الساعه 6 وإذا في مقاضي أو قالتلو الحرمة جيب معاك غدا حيوصل البيت والمغرب يأذن وبعد كده أذن العشاء وما تجي الساعه 10 إلا وهوه بارم نفسه ونايم وصحي للدوام أي حياة واي استقرار بيكون لهدا الموظف في بيته ومع أهله بالعكس حتزيد المشاكل بينهم «انت طول وقتك في الدوام والبيت صار فندق بس للنوم» هدا غير انه بعض الشركات والمؤسسات اللي سمعتها من بره الله الله ومن جوه يعلم الله ما عندها هيكل تنظيمي ولا عندها سلم رواتب ولمن تجي بتتكرم وتعطي زيادات بتعطي بالقطارة وعلى حسب مزاج المسؤول اللي فيها لأنه بسلامتها وزارة العمل ساكته ونايمه على الظلم والجبروت اللي جالس بيصير في هادي الشركات والمؤسسات لأنها ما بتجبر أصحاب هادي الشركات والمؤسسات انه يكون عندها زيادات سنوية للموظف وهما عارفين كيف صارت الحياة صعبة الإجارات زادت والمواد الغذائية زادت والرواتب زي ماهيه مكانك سر .. غير كده انه بعض الشركات والمؤسسات ما عندها إجازة يوم الخميس زي ما هو حاصل في القطاع العام اللي عندهم إجازة يوم الخميس يستمتعوا فيها مع زوجاتهم وأولادهم يقدروا فيها يخرجوا ويروحوا لمكة أو المدينة أو حتى يقضوا يومهم على البحر يغيروا شوية من جو البيت ويصير بينهم ألفة ومحبة وتدوم الحياة بينهم لكن 9 ساعات دوام شي مرهق لرب الأسرة حتى الخميس دوام ما يجي من وراها إلا الخصام والمحاكم عشان كده الموظفين حقون القطاع الخاص يتمنوا انه يكون عندهم إجازة يوم الخميس زي بقية خلق الله هدا غير كمان انهم يتمنوا انه يكون عندهم إجازه أعياد زي إجازة القطاع الحكومي لأنه القطاع الحكومي تبدأ إجازتهم يوم 24 رمضان والغلابا اللي في القطاع الخاص بيكرفوا في الشغل لليلة العيد وهدا فيه إجحاف وظلم لهم ليش ما يكون في مساواة بينهم في إجازة رمضان وإلا هما مكاين مو دم ولحم هدا غير انه في سيدات وبنات بيشتغلوا كمان في القطاع الخاص ليش ما نحببهم في القطاع الخاص ويكون دوامهم برضوا من 7.30 إلى 2.30 لأنه الوحده منهم تكون متزوجه وعندها التزامات في البيت ومع الأولاد ومع الزوج فكفاية عليها إليين الساعة 2.30 عشان تقدر تشوف بيتها وعشان لا تصير مصيبة وترجع لبيت أهلها وكله من تحت راس الدوام اللي أخد وفتها كله واللي لازم تعرفوا وزارة العمل انه قبل 40 سنة ما كان السعوديين يشتغلوا في القطاع الخاص لكن في الوقت اللي نحنا فيه عندنا أكتر من مليون شاب وشابة بيشتغلوا في القطاع الخاص فكيف نحنا نحببهم في القطاع الخاص إذا ما كان فيه مزايا عشان كده بتمنى من وزارة العمل انها تسوي موقع على الإنترنت تستقبل فيه المقترحات من الشباب والشابات السعوديين وكل واحد منهم إذا عنده مقترح يدخل برقم السجل المدني حقه وأنا عارف ومتأكد أنها حتعرف بلاوي ومشاكل تشييب الراس وبعد كده وزارة العمل تشيك على كل المقترحات اللي وصلت للموقع وتحاول قد ما تقدر انه توقف مع هادول الغلابا اللي الشركات والموسسات مصت دمهم وكرفتهم كرف ما يعلم فيه إلا الله سبحانه وتعالى وعشان كمان نقدر نحميهم ونحببهم في القطاع الخاص وإلا انتي إيش رايك يا وزارة العمل وعيشوا كتييييير تشوفوا كتييييير مثل حجازي: لا من خيرو أعطاني ولا من شرو كفاني. [email protected] للتواصل ارسل رسالة نصية sms إلى الرقم 88548 الاتصالات أو الرقم 636250 موبايلي أو الرقم 737701 زين تبدأ بالرمز 150 مسافة ثم الرسالة
