أحياء عشوائية

بالبلدي الفصيح

دحين أنت ما لقيت إلا ده الشارع المقشر وتمشينا منه واللي حيبهدل كفرات السيارة؟ هدا الشارع المقشر اللي بتقولي عليه كان من أحلى الشوارع في المطار القديم مسفلت أحلى سفلتة لكن ايش نقول في الحبايب اللي غاويين هم وغم ونكد يحبووا يعكننوا على الأوادم حتى في الشوارع المسلفتة وبعدين مو جديدة عليهم هما دايما كده يتركوا الشوارع الفرعية اللي جوة الأحياء اللي حالتها بالبلا والبلا لاحقها واللي يبغالها من جد ترقيع وسفلتة من كتر المطبات والحفر اللي فيها ويجووا على الشوارع الرئيسية ويسووا فيها شطار وهات ياتقشير وتخريب في الشوارع الحلوة اللي ما يحتاج لها سفلتة هدا غير الحفر الكبيرة اللي تنحفر بسبب المشاريع ويسيبوها كده مفتوحة زي الحفرة اللي بيقولوا عليها حفرة الموت اللي بلعت أكتر من 30 سيارة لكن ايش نقول أهل العقول في راحة.. طيب يا سيدي انت على فين رايح؟ تعالي حوريكي حي قويزة اللي اتنكب بسبب السيول لأنه المطرة عمرها ما تسووي كده في جدة.. وايش يعني قويزة ياسيدي؟ هدا الاسم جا لأنه هدا الحي كان وادي عميييق اسمه وادي قوز لكن اللي حصل انه الحبايب الهوامير العقرجية ردموه ودفنووه بالقمايم والسيارات حتى انه بعد السيول كنت أتكلم مع واحد شايب من أهل قويزة ومن الناس اللي اتضررت بيقولي تعرف يبو فتو لما حفرت أرضي عشان ابني قبل 25 سنة لقيت سيارة تالفة على بعد خمسة أمتار بس وهدا يدل على انه هدا المخطط كان وادي عميق لكنه الحبايب اللي بالي بالك دمروه ودفنوه وصار مخطط كبير ومعتمد انتهى كلام الشايب... المهم الغلابا اشتروا في ده المخطط من زمان وبنو بيوتهم ومساكنهم وكلهم عندهم صكوك شرعية لبيوتهم عشان كده أهل الحي سموه قويزة نسبة إلى الوادي وشوفي ده شارع يسموه أهل الحي (شارع جاك) نسبة إلى شركة أجنبية كانت تشتغل فيه اسمها جاك شايفة كيف اتبهدل آخر بهدلة بعد السيول وكويس انه نحنا جينا في النهار وشوفي كيف الحي معدوم مبهدل وحالته بالبلا أما لو جينا في الليل حتشوفي كيف الحي مظلم زي الكحل وريحة العفن والقرف طالعة منه المهم اللي على يمينك حي شعبي واللي على شمالك حي مخطط ومعتمد يمكن من حوالي 25 سنة هدا الحي قبل السيول كانت فيه كل متطلبات الحياة من مستوصفات حكومية ودفاع مدني ومدارس ودكاكين يعني كل اللي يحتاجه البني آدم كان متوفر في ده الحي وبعد ما جا السيل صار الحي (أثر من بعد عين) زي ما بيقول سيبويه وجماعته اتهدمت البيوت وانعدمت السيارات وماتوا الرجال والحريم والأطفال وصار في كل بيت حكاية ومعاناة وقصة مؤلمة حيقعدوا يفتكروها طول عمرهم أسأل الله سبحانه وتعالى انه يصبرهم ويكون في عونهم ويجي بعد كده يقولك (حي عشوائي) كيف حي عشوائي وهما عندهم صكوك شرعية لمساكنهم وعلى قول المثل ما تطيح السقيفة إلا على الضعيفة أنا أبغى أعرف كيف تحولت هادي الأودية إلى مخططات نظامية يمتلكها بعض الهوامير؟ وكيف حصلوا على صكوك شرعية موقعة ومختومة باختام القضاة ومن بعض الناس اللي ما يخافوا الله وبعد كده اتحصلوا على تراخيص لتخطيطها وبيعها من أمانة جدة وبعد كده باعوا هادي المخططات على الأوادم اللي اشتروا هادي القطع (بحر مالهم ودم قلبهم) واللي دفعوا فيها مئات الآلاف وبنوا فيها بيوتهم ومساكنهم عشان يرتاحووا من هم وغم الإيجارات ووصلت كل الخدمات اللي تخطر على بالك واللي يحتاجها البني آدم في هادي المخططات وعلى فكرة هدا الكلام ينطبق على كل الأودية اللي اطبقت وانقلبت مخططات وانخدعوا فيها الغلابا من الناس عشان كده أتمنى من كل قلبي ومن كل مسؤول في هدا البلد الكريم انهم يعوضوا هادول الغلابا اللي اشتروا في هادي المخططات يعوضوهم بمنح أراضي بديلة عن هادي البيوت والمساكن اللي تدمرت وراحت عليهم بسبب السيول ويعوضوهم كمان ماليا عشان يقدروا يبنوا بيوتهم ويعيشوا حياة كريمة وينسووا همومهم وأحزانهم اللي عاشوها بعد ما جاهم السيل اللي أكل الأخضر واليابس وخلى حياتهم تعيسة ومؤلمة وعيشووا كتييييير تشوفوا كتيييييير.
هرجة: عظم الله أجركم وأحسن الله عزاكم في كل عزيز فقدتووه بسبب هادي السيول.
abofatoo@hotmail.com
فاكس: 6764070
للتواصل ارسل رسالة نصية sms إلى الرقم 88548 الاتصالات أو الرقم 636250 موبايلي أو الرقم 737701 زين تبدأ بالرمز 150 مسافة ثم الرسالة