null

ايش ده ياسيدي اشبو كده توبك معدوم مطره وتراب؟ لا تقولي انك جيت كلانكاكي (كعابي ) من الجريده ؟ ايوه ياستي هو ده اللي صار خرجت من الجريدة وقت ماكانت المطره بتمطر ابغى ارجع للبيت قبل ما ندخل في زحمة الشوارع وتصير جده لعبكه وحيص بيص وركبت السيارة وجيت ابغى امسك الخط السريع لقيتو مقفل قلت ياهوه ايش الحكاية قالوا ارجع لا تموت قويزة وأم الخير فيها سيول والخط السريع كله مقفل جيت راجع من نفس الخط ورحت على شارع فلسطين برضو لقيتو مقفل وجيت ابغى ادخل على حي بني مالك برضو لقيتو مقفل من كثر السيارات اللي متعطله وواقفه قمت ركنت السيارة بعد ما شرقت وتفتفت وشربت من موية المطره جنب محطة الشمس واول ما فتحت باب السيارة الا وموية المطره بهدلتني وبهدلت السيارة عشان كده مشيت كلانكاكي لحد البيت وصار شكلي زي عمال العماير موية واسمنت واحمدي ربك اني رجعتلك حي والا كنت من الغارقين وزي منتي عارفة انا راجل طويل (طولي متر على كم شبر) يعني اغرق في طشت موية لكن الحمد لله ربنا ستر ولطف... طيب ياسيدي ايش حكاية أم الخير وقويزة يعني كل ماجات المطرة حيدبهدلوا كده ؟ يعني هما حقون ام الخير وقويزه بس اللي اتبهدلوا جده كلها معدومه وصار عندنا بدل أم الخير امهات .. أم شارع الستين معدوم وأم حي النسيم معدوم وأم حي السامر معدوم وأم حي الوزيريه معدوم وأم حي الصفا معدوم وأم حي المكرونه معدوم كل جده من شمالها وجنوبها وغربها وشرقها معدوم سواء كانت الاحياء الراقية او العشوائية .. يا الله ياسيدي يعني ما يكفي اللي حصلهم السنة اللي فاتت يعني كل الاجتماعات والتصاريح اللي كنا بنسمعها من المسؤولين في الأمانة عن دي المصايب وانهم حيشوفوا حل لها كلها طلعت حبر على ورق .. والله ياستي ما أقولك الا خير من يوم ماخلصت الكارثة حق سيول العام وما نقرأ في الجرايد الا انه عندهم اجتماعات في اجتماعات وتصاريح في تصاريح وانهم حيشوفوا حل لكل هادي المصايب اللي بتصير للاوادم في حي قويزة وأم الخير وفي جده كلها لكن اللي بنشوفه كلام في كلام وزي ما بيقولوا (تيتي تيتي زي ما رحتي زي ما جيتي ويا قلبي لا تحزن وانكشف المستور).. صحيح انه المطره نعمه من الله لكن جده واهلها صاروا يكرهوا المطره لانها بتتعبهم وتنكد عليهم حياتهم اكتر من انها بتفرحهم ويحلموا لو فكروا انه احد حيعوضهم عن سياراتهم وبيوتهم اللي عدمتها المطره لانه المطره بتجي على جده وتصب لمدة دقايق تلاقي جده غرقت..
سكان ام الخير اشتروا فلل بعرق جبينهم هذا غير انه في منهم اشتروا الفلل بالاقساط وورطوا المساكين هيا بالله مين يعوضهم على النصب اللي صار لهم ويكون في علمك مخطط ام الخير كان في الاساس وادي استغلوه بعض ضعاف النفوس اللي مايخافوا الله وردموا الوادي وسفلتوه وباعوه فلل سكنية على الغلابا ياويلهم من الله عالم ذمتها واسعه يقول الرسول الكريم في الحديث الصحيح (من اقتطع شبرا من ارض بغير حق طوق به سبعين خريفا في النار) آآآآآه ياجده كل ماجاتك مطرة حيكون حالك كده .. آآآآآآه ياجده كل ماجاتك مطرة حنلاقي الوايتات شغاله شفط في المويات ونحنا كل سنه بنسمع عن مليارات لمشاريع تصريف مياة الامطار.. آآآآآآه يا جده كل ماجاتك مطره حنلاقي الشوارع مقفلة والكباري مليانة مويات والمقاولين بيلهفوا مليارات الريالات على مشاريع مضرووبه .. آآآآآآه يا جده وياسكان جده الغلابا الله يعينكم على اللي انتو فيه وعيشوا كتيييييير تشوفوا كتيييييير.
مثل حجازي/ قالوا لفرعون ايش فرعنك قال ما لقيت احد يردني.
للتواصل ارسل رسالة نصية sms إلى الرقم 88548 الاتصالات أو الرقم 636250 موبايلي أو الرقم 737701 زين تبدأ بالرمز 150 مسافة ثم الرسالة