مليار حمى الضنك راح فشنك

بالبلدي الفصيح

لا تنسى ياسيدي وانت خارج تاخد معاك الشابورة وكوب الحليب عشان تشربوا وانت رايح للجريدة .. لا ياستي لا ابغى شابورة ولا حليب خلي كوب الحليب عندك .. ليه يا سيدي هوه ايش اللي حصل؟ اصلك انتي منتي عارفة ايش الحكاية؟ وايش هيه الحكاية ياسيدي ؟ الحكاية ياستي هوه انه كل يوم الحليب بيتكبكب في السياره وعلى التوب من كتر المطبات والحفر اللي مزبرقة شوارع جده، والحبايب مو فالحين الا انهم يسفلتوا الشوارع الرئيسية، لكن جوة الاحياء يفتح الله هدا غير اذا عرفنا انه الاسفلت اللي بيستخدموه من نوع مشي حالك شوية حصى على شوية حبر اسود وقلك سفلتوا الشارع ولو جات شوية مويه من وايتات التحلية والا الصرف الصحي واللي مو راضية تنقطع عن البلد او شوية مطرة بان المستخبي والمستور لانه الاسفلت اللي بيستخدموه من اجود الانواع زي منتو عارفين عشان كده بعد فتره تلاقي الاسفلت اتنفش اكيد الحبايب خلطووه ( بالبينكبودر) عشان كده بقولك خلي الحليب عندك لانه مع الخضخضه حق المطبات والحفر حيصير (جبنه) يللا اشوفك على خير انا رايح للجريدة .. المهم ركبت سيارتي ورايح للجريدة وكانت اذاعة البرنامج الثاني من جده شغاله على برنامج (صباح النور يا بلدي) وكان اللي بيقدم البرنامج اثنين من الزملاء فهد الياسي والاخت روان عاشور وكان الاستطلاع اللي بيتكلموا فيه مع المستمعين عن موضوع حمى الضنك وعن الاجتماع اللي حصل مابين اتنين من المسؤولين الأولاني من وزارة الصحة والتاني من امانة جده وكل واحد منهم كان بيرمي التهمه على التاني وانه هوه السبب الرئيسي في انتشار هدا المرض اللي بتشتكي منه مدينة جده من سنوات ونحنا الغلابا نروح فطيس، انا ماني عارف فين راحت مليارات الريالات اللي خصصتها الدولة عشان تقضي على هادي المصيبة اللي اسمها حمى الضنك اللي بتنتشر انتشار كبير في البلد هدا اذا عرفنا انه 800 حالة بس في جنوب جده يعني بمعدل 7 الى 8 حالات يوميا فما بالك في المناطق التانية هدا غير اللي بيحصل في جازان من حالات حمى الضنك وخلوكم معايا وشوفوا المبالغ اللي خصصتها الدولة لمكافحة هدا المرض .. 8 مليارات لمكافحة حمى الضنك .. اعتماد بليون وخمسمائة مليون لمكافحة حمى الضنك .. مليار و 424 مليون ريال للقضاء على حمى الضنك نهائيا بجدة .. هيا بالله عليكم فين راحت هادي المليارات اللي بقيمتها تبني مدينه جديده بحالها ولسه جده واهلها بيعانوا من ده المرض سنين وسنين، ياناس ياهووه فين ضمايركم خلاص دخلت الدنيا في قلوبكم وصرتوا ما تفرقوا بين الحلال والحرام، جدة واهلها ادهملوا واتبهدلوا ومرضوا وماتوا وانتو ساكتين على هادي الحمى اللي جابت ارواح الاوادم، الى هادي الدرجة صارت ارواح الاوادم رخيصة عندكم ياويلكم من الله فين حتروحوا من رب العباد اللي عالم وشايف ومطلع على كل شي، عمرنا ما سمعنا عن هادي الحمى الا عندنا واللي منتشره في اغلب المناطق حتى افريقيا السوداء اللي فيها اشكال وانواع الامراض ما سمعنا انه عندهم حمى الضنك ياناس ياهووه شوفوا حل سريع وعاجل للمصيبة دي الاوادم حاطه يداتها على قلوبها وخايفه على ارواحها من دي الحمى اللي ما تعرف لا صغير ولا كبير ولا راجل ولا حرمه شوفوا حل قبل ما تجي الفاس في الراس ونقول ياريت وكلمة ياريت ما تعمر بيت وعيشوا كتيييييير تشوفوا كتيييييير.