يامؤسسات الحج

بالبلدي الفصيح

دحين قلتلك هات معاك طبق بيض وانت بسلامتك داخل البيت وفي يدك ديك ودجاجة ليش وعشان ايش ؟ عشان ياستي نبغى ناكل بيض بلدي أحسن من البيض اللي بينباع في السوق اللي كله كيماوي في كيماوي لانه صاحب السوبرماركت رفع ضغطي وفور دمي قاعد يبيع طبق البيض ب(15 ريال) اقولوا ليه والبيض كان سعره ب (10 ريال) يقولي عشان الحج ارتفع سعرو قلتلو وانت الصادق مو عشان الحج عشان ما عندك احد كل واحد منكم بيبيع بكيفه لا رقابة ولا ما يحزنون التجارة ساكته وحماية المستهلك مغمضة عينها وبعدين هية جات على البيض كل شي ارتفع سعرو ولا ح ينزل بعد كده والحبايب سكتم بكتم لا أرى لا أسمع لا أتكلم .. طيب يا سيدي ايش سويت في حكاية الحج طالما قالوا انه في حج مخفض السنة دي وانه سعر الحاج حيكون في حدود 1900 ريال و3900 ريال .. وانتي صدقتي الكلام ده انه في حج مخفض الناس الغلابا من عمال وسواقين وخادمات منازل واللي بيحجوا بسعر 1900 ريال حيكون موقعهم في فئة د أو فئة ه وهادول الموقعين موجودين في أطراف منى يعني يامليح دقها كلانكاكي «كعابي» بين المشاعر وبعدين مؤسسات الحج المخفض فينها ما اعلنت عن نفسها عشان الناس تعرفها وبعدين يكون في علمك اصلو أصحاب حملات الحج من شهر القعدة وهما شغالين دعاية واعلان في الجرايد وعلى الجوالات ومافي الا رسايل وكله بيقول الحج معانا مخفض ولما تتصل عليهم وتسأل بكم النفر يردووا عليك بفم مليان وعيون قوية الخيمة العادية ب 4000 ريال والجناح ب 7000 هدا غير أسعار الحج الخيالية اللي بيقولوا عليها ال VIP حتى حملات الحج فيها درجة تانية ودرجة أولى ودرجة اوفق الله المستعان والحكاية كلها اسبوع واصحاب حملات الحج مافي الا سلخ في عباد الله لا والمصييبة مو هنا المصييبة انة في بعض من حملات الحج بتقدم خدمات النت وعرض القنوات الفضائية ياسبحان الله أنا ماني عارف كيف الاوادم دي بتحج وهية جالسة على نت وفضائيات ياناس ياهووه خافوا الله شوية هادي أيام فضيلة أيام عبادة.. بالله عليكم لما يكون سعر النفر اللي يبغى يحج ب 6000 ريال كيف يحج وبهدا السعر الغالي ولو فكر انه يحج هوه وزوجتة وواحد من أولاده ووحده من بناته يعني يبغالوا بالميت 24000 ريال على كده يبغالوا بشتري سيارة ويبيعها بخسارة عشان يحج الله يرحم أيام الحج زمان أيام المرسديسات واللواري الكبيرة لا كان في شركات حج ولا ما يحزنون كان المرسيدس والا اللوري ينقسم دورين الدور اللي فوق للرجال والدور التحتاني للحريم وكان حج من احلى وابدع مايكون وبعدين على أي اساس يكون السعر المخفض ب 3900 ريال ادا كان سعر ايجار الخيمة معروف والمواصلات والمواد الغذائية والخدمات معروفه هدا وهوه مخفض طيب والغير مخفض كم حيكون سعروو يا أصحاب حملات الحج ارضوا بالقليل عشان ربنا يباركلكم في رزقكم الاوادم مو ناقصة مصاريف وهم وغم وارحموا من في الارض يرحمكم من في السماء ونحنا في هادي الأيام الفضيلة الدعاء فيها مستجاب وعيشووا كتيييييير تشوفوا كتيييييير
abofatoo@hotmail.com
فاكس : 6764070
للتواصل ارسل رسالة نصية sms إلى الرقم 88548 الاتصالات أو الرقم 636250 موبايلي أو الرقم 737701 زين تبدأ بالرمز 150 مسافة ثم الرسالة