ياسيدي تعال ترى سامعه هرج ومرج في الشارع مدري إيش الحكايه أوادم واقفه تحت باب العماره .. طيب طيب دحين حنزل أشوف ايش الحكاية .. كده يا سيدي حتنزل بالفوطة والفلينة أبو عسكري؟.. أيوه ياستي كده حنزل بالفوطة والفلينة أبو عسكري اللي من أيام هتلر على قول حبيبنا الجداوي المعتق عبد المحسن دوم بعدين هوه أنا رايح أخطب أنا حنزل أشوف الحكاية ايه وراجع .. ونزلت الشارع ولقيت عم معتوق ومعاه رجاجيل ياكثرهم واقفين عند باب العمارة .. وأول ماشافني عم معتوق قال لي: يعني عاجبك اللى جالس يصير فينا وساكت .. أصحاب العماير هلكونا في الإيجارات كل ماغلقت سنة من الإيجار فتحوا فمهم وقالوا يبغوا زيادة في الإيجار (ياتدفع ياتنقلع) من فين نجبلهم نحنا ؟ نروح ننهب؟ والا نروح نسرق؟ والا نسوي مساهمات وهمية ونضحك على عباد الله .. دخيلك يا بو فتو أتكلم بصوتنا ترى الحال ما يعلم بيها إلا الله، وأصحاب العماير الجشع والطمع عمى عيونهم وقلوبهم .. رواتبنا يلا تكفينا عشان ندفع الإيجار ومقاضي البيت ومصاريف البزورة وانت عارف البير وغطاه حتى فواتير الكهرباء زادت علينا لأنه شركة الكهرباء زودت التعرفة علينا (والفاتورة اللي كانت سكني صارت بقدرة قادر تجاري في نظر السادة شركة الكهرباء).. ايش نسوي نحنا أهل الدخل المحدود ننصب خيام في الشوارع عشان نسكن ونعيش .. رواتبنا يلا تكفينا عشان نعيش حياة كريمة وهادول أصحاب العماير مافي أحد قادر يوقفهم عند حدهم شغالين سلخ في عباد الله ماعندهم رحمة ولا خوف من رب العباد لأنهم خلاص ماسكين اسطوانة (العقار حر) واللي مو عاجبه يشرب من البحر، هادول ما خلوها (حر) هادول الجشعين اللي ما يخافوا الله (خلوها خل) .. عماير قديمة مبنية لها عشرات السنين وهما جالسين يرفعوا في الإيجارات يعني ما اتبهدلوا ولاخسروا من حكاية ارتفاع الاسمنت والحديد وبرضو يرفعوا في الإيجارات لكن ايش نقول، هوه لو في نظام وفي قانون يحمينا من هادول الهوامير ما كان حصل ده اللعب والضحك على عباد الله .. الأراضي زي منت عارف أسعارها نار ومحنا قادرين نشتري .. شوية تراب مساحته 625م2 يوصل سعره لمليون ونص ليه ؟ ومن فين نجيبلهم؟ .. حتى شقق التمليك تجي تسأل على الشقة بكم، يقولك 600 ألف، وإن كان جاب البنك وسيط صار سعرها مليون وميتين ألف ريال وفي الأخير يجي محافظ مؤسسة النقد ويقول بالفم المليان الإيجارات حتنزل.. من جد هم يبكي وهم يضحك شكلو أخينا عايش في قصر ومو عارف ايش قاعد يصير في البلد أي إيجارات حتنزل ونحنا كل يوم بنسمع عن ارتفاع الإيجارات إذا كان شقة من غرفتين ومطبخ وصالة وحمام إيجارها 18000 ألف .. بعدين يجي يقول لك عندنا مليون عانس كيف تبغوا البنات يتزوجوا وأسعار الإيجارات بالشكل ده، هدا وانت عارف انه راتب الجامعي يللا يكفيه مصروف جيبه .. دخيلك يبو فتو أتكلم وصل صوتنا للمسؤولين ترى خلاص صرنا مخنوقين من فين نلاقيها من أصحاب العماير اللي ما يخافوا الله في عباد الله والا من الأسعار اللي كل يوم بترتفع الييين نفضت جيوبنا وخلت حياتنا كلها أقساط ودين وسلف.. بعدين تعال هنا قوول لي فين مشروع السكن الميسر اللي قالوا عليه والا الحكاية كلها خبر في جريدة.. الأراضي يا كترها في البلد وعلى قد مد البصر اتعاقدوا مع شركات مقاولات لها القيمة وخلوها تبني شقق تمليك وتتقسط على الغلابا بأسعار معقولة وخليهم يسكنوا ويعيشوا بدل هادي المرمطة اللي نكدت وعكننت عليهم حياتهم .. تركني عم معتوق وأصحابه بعد ما قال كل اللي في قلبه .. وأنا رجعت للبيت وقعدت أردد حسبي الله ونعم الوكيل .. حسبي الله ونعم الوكيل .. الواحد ايش يقول إلا عيشوا كتيييييير تشوفوا كتيييييير. هرجة: يامسؤولين ياناس ياهووه دبروها وشوفوا لها حل أليين متى وهوامير العماير والأراضي جالسين يحرقوا في دم الغلابا. [email protected] !!Article.extended.picture_caption!! للتواصل ارسل رسالة نصية sms إلى الرقم 88548 الاتصالات أو الرقم 636250 موبايلي أو الرقم 737701 زين تبدأ بالرمز 150 مسافة ثم الرسالة
